നെയ്യാറ്റിന്‍കര (തിരുവനന്തപുരം): എ.എസ്.ഐയെ വെടിവെച്ചു കൊലപ്പെടുത്തിയ സംഭവത്തില്‍ പിടിയിലായ പ്രതികള്‍ക്ക് ഐ.എസ് ഭീകര സംഘടനയുമായും ആയുധക്കടത്തുമായും ബന്ധമുണ്ടെന്ന് സംശയിക്കുന്നതായി കര്‍ണാടക പൊലിസ്. കൊലപാതകം നടത്താന്‍ പ്രദേശവാസികളായ ചിലരുടെ സഹായമുണ്ടായെന്ന സൂചനകളും പൊലിസിന് ലഭിച്ചു.
സംഭവത്തില്‍ നേരിട്ടും അല്ലാതെയും 16 പേര്‍ ഉള്‍പ്പെട്ടിട്ടുണ്ടെന്നാണ് അന്വേഷണ സംഘത്തിന്റെ നിഗമനം. അതേസമയം സംഭവത്തില്‍ കളിയിക്കാവിളയില്‍ നിന്ന് 18 പേരെ കൂടി കസ്റ്റഡിയിലെടുത്തിട്ടുണ്ട്. ഇതില്‍ രണ്ടുപേര്‍ തമിഴ്‌നാട് തിരുനെല്‍വേലി സ്വദേശികളാണ്. കൊലപാതകക്കേസിലെ മുഖ്യപ്രതികളായ തൗഫീഖും (28) ഷമീമും (32) അറസ്റ്റിലായിട്ടുണ്ട്. ഇവരെ ഉഡുപ്പിയിലെ രഹസ്യകേന്ദ്രത്തിലെത്തിച്ച് ചോദ്യം ചെയ്യുകയാണ്.