തിരുവനന്തപുരം: കേരളത്തിലെ ഡാമുകളുടെ റിസര്‍വോയറുകളില്‍നിന്ന് മണ്ണും ചെളിയും നീക്കം ചെയ്യുന്നതിനായി കേരള ജലസേചന വകുപ്പ് ഏറ്റെടുത്ത 'ഡാം ഡീസില്‍റ്റേഷന്‍ പ്രോജക്ട്' യാഥാര്‍ഥ്യമാകുന്നു. പാലക്കാട് ജില്ലയിലെ മംഗലം, ചുള്ളിയാര്‍ അണക്കെട്ടുകളിലാണ് പൈലറ്റ് അടിസ്ഥാനത്തില്‍ ഏറ്റെടുക്കുവാന്‍ തീരുമാനിച്ചിരുന്നത്.
ഇതില്‍ മംഗലം ഡാമിന്റെ ടെണ്ടര്‍ പ്രസിദ്ധീകരിച്ചു. 2.95 മില്ല്യന്‍ ക്യൂബിക് മീറ്റര്‍ മണ്ണും ചെളിയും നീക്കം ചെയ്യുവാനാണ് തീരുമാനം. 2017 ലാണ് സര്‍ക്കാര്‍ ഈ പദ്ധതികളുമായി മുന്നോട്ടു പോകാന്‍ തീരുമാനിച്ചത്. തുടര്‍ന്ന് പദ്ധതി തയാറാക്കുവാന്‍ സാങ്കേതിക സമിതിയും പദ്ധതിക്ക് അംഗീകാരം നല്‍കുന്നതിനും മേല്‍നോട്ടം വഹിക്കുന്നതിനും ചീഫ് സെക്രട്ടറി ചെയര്‍മാനായി എംപവേര്‍ഡ് കമ്മിറ്റിയും രൂപികരിച്ചു.
പദ്ധതി തയാറാക്കുന്നതിനും നടപ്പാക്കുന്നതിനുമായി വ്യക്തമായ സ്റ്റാന്റ്‌റേര്‍ഡ് ഓപ്പറേഷന്‍ പ്രൊസീഡ്യൂറും (എസ്.ഒ.പി) മന്ത്രിസഭ അംഗീകരിച്ചു. എന്‍.സി.ഇ.എസ.്എസ്, കെ.ഇ.ആര്‍.ഐ തുടങ്ങിയ ഗവേഷണ സ്ഥാപനങ്ങളുടെ സഹായത്തോടെ 1170 മണ്ണ് സാമ്പിളുകള്‍ ശേഖരിച്ച് മണ്ണിന്റെ ഘടന പരിശോധിക്കുകയും പരിസ്ഥിതി സംബന്ധിച്ച കാര്യങ്ങള്‍ പഠിച്ചു തയാറാക്കിയ എന്‍വയോണമെന്റ് മാനേജ്‌മെന്റ് പ്ലാന്‍, മണ്ണും ചെളിയും നീക്കം ചെയ്യുന്നതിനുള്ള ട്രാന്‍സ്‌പോര്‍ട്ടേഷന്‍ പ്ലാന്‍ എന്നിവ തയാറാക്കുകയും ചെയ്തു.
ആഗോള ടെണ്ടര്‍ അടിസ്ഥാനത്തിലുള്ള കരാര്‍ വ്യവസ്ഥകളാണ് ഉള്‍ക്കൊള്ളിച്ചിട്ടുള്ളത്. കൂടുതല്‍ തുക രേഖപ്പെടുത്തുന്ന ഏജന്‍സിക്കു കരാര്‍ നല്‍കും.
റിസര്‍വോയറിലെ വെള്ളത്തിന്റെ ഗുണനിലവാരത്തെ ബാധിക്കാത്ത രീതിയിലും പരിസ്ഥിതിക്കു യാതൊരു ഹാനികരവും ഉണ്ടാകാത്ത രീതിയിലും നിലവിലുള്ള ഗതാഗതത്തെ ബാധിക്കാത്ത രീതിയിലും പൊതുജനങ്ങള്‍ക്ക് ബുദ്ധിമുട്ട് ഉണ്ടാകാത്ത രീതിയിലുമാണ് പദ്ധതി വിഭാവനം ചെയ്തിട്ടുള്ളത്.
നിലവിലുള്ള മത്സ്യകര്‍ഷകരുടെ പുനരധിവാസവും ഉറപ്പാക്കും. മാര്‍ച്ച് മാസത്തോടെ കരാര്‍ ഉടമ്പടിയില്‍ ഏര്‍പ്പെടാന്‍ കഴിയുമെന്നാണ് പ്രതീക്ഷ. മൂന്ന് വര്‍ഷം കൊണ്ടു പദ്ധതി പൂര്‍ത്തിയാക്കും.
റിസര്‍വോയറിന്റെ സംഭരണശേഷി പുനഃസ്ഥാപിച്ചു കൊണ്ട് കുടിവെള്ളത്തിനും കൃഷിക്കും കൂടുതല്‍ വെള്ളം ലഭ്യമാക്കുക, അതുവഴി വരള്‍ച്ചയില്‍നിന്നും വെള്ളപ്പൊക്കത്തില്‍നിന്നും ആശ്വാസം കണ്ടെത്തുക, മണല്‍, ചെളി തുടങ്ങിയ നിര്‍മാണ വസ്തുകളുടെ ദൗര്‍ലഭ്യം പരിഹരിക്കുക, സര്‍ക്കാരിന് വരുമാനം ലഭ്യമാക്കുക എന്നിവയാണ് പദ്ധതി മൂലം ലഭിക്കുന്ന പ്രയോജനങ്ങള്‍.