ഹൈദരാബാദ്: തോല്‍വികളില്‍ നിന്ന് മോചനം നേടാനാകാതെ ഹൈദരാബാദ് എഫ്.സി. ഇന്നലെ നടന്ന മത്സരത്തില്‍ ഒഡിഷയോടാണ് ഹൈദരാബാദ് പരാജയപ്പെട്ടത്. 2-1 എന്ന സ്‌കോറിനാണ് ഒഡിഷ ഹൈദരാബാദിനെ പരാജയപ്പെടുത്തിയത്. ഒന്നാം മിനുട്ടില്‍ ഒഡിഷയെ ഞെട്ടിച്ച് ഹൈദരാബാദ് ആദ്യ ഗോള്‍ നേടിയെങ്കിലും 15-ാം മിനുട്ടില്‍ സന്റാനയിലൂടെ ഒഡിഷ ഗോള്‍ മടക്കി. ആദ്യ പകുതിയുടെ അധിക സമയത്ത് ഹൈദരാബാദ് താരം ഡിംപ്ള്‍ ഭഗത് ചുവപ്പ് കാര്‍ഡ് കണ്ട് പുറത്തായതോടെ ഹൈദരാബാദ് പത്തു പേരായി ചുരുങ്ങി. തൊട്ടടുത്ത മിനുട്ടില്‍ ലഭിച്ച പെനാല്‍റ്റി സന്റാന ലക്ഷ്യത്തിലെത്തിച്ചതോടെ ഒഡിഷക്ക് ഒരു ഗോള്‍ ലീഡ് ലഭിച്ചു. ഗോള്‍ മടക്കുന്നതിന് ഹൈദരാബാദ് കിണഞ്ഞ് ശ്രമിച്ചെങ്കിലും രക്ഷയുണ്ടായില്ല. ജയത്തോടെ 13 മത്സരത്തില്‍ നിന്ന് 21 പോയിന്റുമായി ഒഡിഷ പട്ടികയില്‍ നാലാം സ്ഥാനത്തെത്തി. ഇന്ന് നടക്കുന്ന മത്സരത്തില്‍ ചെന്നൈയിന്‍ എഫ്.സി നോര്‍ത്ത് ഈസ്റ്റ് യുനൈറ്റഡിനെ നേരിടും.