റിയാദ്: സഊദിയില്‍ തൊഴില്‍ വിസ കാലാവധി രണ്ടു വര്‍ഷമായി ഉയര്‍ത്തി. നിലവില്‍ ഒരു വര്‍ഷത്തേക്ക് നല്‍കിയിരുന്ന വിസയാണ് ഒരു വര്‍ഷത്തില്‍നിന്ന് രണ്ടു വര്‍ഷമായി തൊഴില്‍, സാമൂഹിക വികസന മന്ത്രാലയം ദീര്‍ഘിപ്പിച്ചത്. നേരത്തെ, സഊദിവല്‍ക്കരണവുമായി ബന്ധപ്പെട്ടു ഒരു വര്‍ഷമാക്കി കുറച്ച വിസ കാലാവധി രണ്ട് വര്‍ഷമാക്കുന്നത് സ്വകാര്യ മേഖലയിലെ കമ്പനികള്‍ക്ക് അവരുടെ വിസ, റിക്രൂട്ടിങ് നടപടികള്‍ക്ക് ആശ്വാസം ലഭിക്കാനാണെന്ന് തൊഴില്‍ മന്ത്രാലയം വ്യക്തമാക്കി.

യാതൊരു ഫീസും നല്‍കാതെ കാലാവധി ദീര്‍ഘിപ്പിക്കുന്നതിനാണ് മന്ത്രാലയം സൗകര്യം ഒരുക്കിയത്. വിസ കരസ്ഥമാക്കുന്ന കമ്പനികള്‍ക്ക് രണ്ട് വര്‍ഷത്തിനകം റിക്രൂട്ട്‌മെന്റ് പൂര്‍ത്തിയാക്കിയാല്‍ മതി. സ്വകാര്യ മേഖലാ സ്ഥാപനങ്ങള്‍ നേരിടുന്ന പ്രശ്‌നങ്ങള്‍ കണക്കിലെടുത്തും പ്രതിബന്ധങ്ങള്‍ക്ക് പരിഹാരം കാണുന്നതിനുമാണ് വിസാ കാലാവധി രണ്ടു വര്‍ഷമായി നീട്ടാന്‍ തീരുമാനിച്ചതെന്ന് തൊഴില്‍, സാമൂഹിക വികസന മന്ത്രാലയം പറഞ്ഞു.

വിസ ലഭിക്കുന്നതിനുള്ള വ്യവസ്ഥകള്‍ പൂര്‍ണമാണെങ്കില്‍, നേരത്തെ ലഭിച്ച ഒരു വര്‍ഷ കാലാവധിയുള്ള വിസകള്‍ റദ്ദാക്കി രണ്ടു വര്‍ഷ കാലാവധിയുള്ള പുതിയ വിസകള്‍ നേടുന്നതിന് സ്വകാര്യ സ്ഥാപനങ്ങള്‍ക്ക് അവകാശമുണ്ടെന്നും മന്ത്രാലയം വ്യക്തമാക്കി.

എന്നാല്‍, സ്വദേശിവത്ക്കരണം പ്രോത്സാഹിപ്പിക്കലും കാലാവധി നീട്ടി നല്‍കുന്നതിന്റെ ലക്ഷ്യമാണ്. മന്ത്രാലയം അനുവദിച്ച വിസയില്‍ കൂടുതല്‍ സാവകാശമെടുത്ത് ആവശ്യമെങ്കില്‍ മാത്രം വിദേശ റിക്രൂട്ടിങ് നടത്താനും അനുയോജ്യരായ സ്വദേശികളെ കണ്ടെത്താനും ഇതിലൂടെ സാധിക്കുമെന്നാണ് തൊഴില്‍ മന്ത്രാലയം പ്രതീക്ഷിക്കുന്നത്.