ജലുവാന്‍(യു.പി): ചമ്പല്‍ കാടുകളെ വിറപ്പിച്ച കൊള്ളക്കാരി ഫൂലന്‍ ദേവിയുടെ മാതാവും സഹോദരിയും ജീവിക്കാനായി കഷ്ടപ്പെടുന്നു. പട്ടിണികൊണ്ട് അതിജീവനം പ്രതിസന്ധിയിലായ ഇവര്‍ എങ്ങനെ ജീവിക്കുമെന്നറിയാതെ കഷ്ടപ്പെടുകയാണ്.
കൊള്ളസംഘം വിട്ട് സാധാരണ ജീവിതത്തിലേക്ക് വന്ന ഫൂലന്‍ ലോക്‌സഭാംഗമായിരിക്കെ 2001 ജൂലൈ 25നാണ് ഡല്‍ഹിയില്‍ വെടിയേറ്റ് മരിക്കുന്നത്. തുടര്‍ന്ന് ഇവരുടെ ബന്ധുക്കളെക്കുറിച്ച് ആരും അന്വേഷിച്ചില്ല. ഇപ്പോഴിതാ കൊടിയ ദാരിദ്ര്യത്തില്‍ കഴിയുന്ന വാര്‍ത്ത പുറത്തുവന്നിരിക്കുന്നു. ഫൂലന്റെ മാതാവും സഹോദരിമാരും അവരുടെ  മക്കളും കൊടിയ ദാരിദ്ര്യത്തിലാണെന്ന വിവരം മാധ്യമങ്ങള്‍ റിപ്പോര്‍ട്ട് ചെയ്യുന്നു.  ഫൂലന്റെ സഹോദരിയായ രാംകലി ദേവിക്ക് തൊഴിലുറപ്പ് പദ്ധതിയില്‍ നിന്ന് ലഭിക്കുന്ന പണമാണ് ഇവരെ ഇപ്പോള്‍ ജീവിപ്പിക്കുന്നത്.
ഫൂലന്‍ ആയിരുന്നു ഇവര്‍ക്ക് ഭക്ഷണവും വസ്ത്രങ്ങളുമെല്ലാം നല്‍കിയിരുന്നത്. അവരുടെ മരണത്തോടെ വല്ലാത്ത അനിശ്ചിതത്വമാണ്. ഫൂലന്റെ പേരിലുണ്ടായിരുന്ന കൃഷി ഭൂമി, പെട്രോള്‍ പമ്പ് എന്നിവയെല്ലാം നഷ്ടപ്പെട്ടു. ഇതിനിടയില്‍ പലയിടത്തുനിന്നും ഭീഷണിയും വരുന്നു. തെരഞ്ഞെടുപ്പില്‍ മത്സരിക്കാനായി രാംകലിക്ക് മുലായം സിങ് യാദവ്  ടിക്കറ്റ് വാഗ്ദാനം ചെയ്തിരുന്നെങ്കിലും നല്‍കിയില്ലെന്ന് അവര്‍ പറഞ്ഞു.
സാമ്പത്തിക സ്ഥിതിയെക്കുറിച്ച് സര്‍വെ നടത്താനെത്തിയ ഒരു സന്നദ്ധ സംഘടനയാണ് ഇവരുടെ ദൈന്യത മാധ്യമുങ്ങള്‍ക്ക് മുന്നിലെത്തിച്ചത്.  പ്ലാസ്റ്റിക് ഷീറ്റുകൊണ്ട് മറച്ച കുടിലില്‍ താമസിക്കുന്ന ഇവരെ രാഷ്ട്രീയ നേതൃത്വങ്ങളെല്ലാം അവഗണിക്കുകയാണെന്നും എന്‍.ജി.ഒ പറയുന്നു.