പൈവളികെ: പൈവളികെ പഞ്ചായത്ത് കുരുഡപദവ്, സദങ്കയ റോഡിലെ ട്രാന്‍സ് ഫോര്‍മര്‍ അപകടഭീഷണി ഉയര്‍ത്തുന്നു. ട്രാന്‍സ് ഫോര്‍മറിന്റെ ഫ്യൂസ് ബോക്‌സും പോസ്റ്റും ജീര്‍ണിച്ച നിലയിലാണ്. നിരവധി കാല്‍നടയാത്രക്കാര്‍ നിരന്തരം കടന്നു പോവുന്ന വഴിയില്‍ ജീര്‍ണിച്ച നിലയിലുള്ള ട്രാന്‍സ്‌ഫോര്‍മര്‍ നന്നാക്കണമെന്നു അധികൃതരോടാവശ്യപ്പെട്ടെങ്കിലും നടപടിയൊന്നുമുണ്ടായില്ല.
ഇപ്പോള്‍ കാടുകയറിയിരിക്കുകയാണ്. ഒരു മാസം മുമ്പ് ഈ ട്രാന്‍സ്‌ഫോര്‍മര്‍ ഷോര്‍ട്ട് സര്‍ക്യൂട്ടില്‍ കത്തി സമീപത്തെ പുല്‍ച്ചെടികള്‍ക്കും മറ്റും തീപിടിച്ചിരുന്നു.
നാട്ടുകാര്‍ ഓടി കൂടി തീയണച്ചതു കൊണ്ടു വന്‍ ദുരന്തം ഒഴിവാകുകയായിരുന്നു. എന്നാല്‍ പരാതിയൊന്നും ചെവിക്കൊള്ളാന്‍ അധികൃതര്‍ തുനിയുന്നില്ലെന്നാണു പരിസരവാസികളുടെ പ്രതികരണം.