കോഴിക്കോട്: കൂത്തുപറമ്പ് എക്‌സൈസ് സംഘം നടത്തിയ വാഹന പരിശോധനയില്‍ സ്‌കൂട്ടറില്‍ കടത്തുകയായിരുന്ന 78 കുപ്പി മാഹിമദ്യവുമായി ഒരാളെ പിടികൂടി. കുറ്റ്യാടി എടച്ചേരിക്കണ്ടി വീട്ടില്‍ ഇ.കെ ബാബുവിനെ (44) ആണ് എക്‌സൈസ് റേഞ്ച് പ്രിവന്റിവ് ഓഫിസര്‍ സുധീര്‍ വാഴവളപ്പില്‍ അറസ്റ്റ് ചെയ്തത്. ചൊക്ലി ബീഡി പീടികയ്ക്കു സമീപം വാഹനപരിശോധന നടത്തവെയാണ് ഇയാള്‍ പിടിയിലായത്. മദ്യം കടത്താന്‍ ഉപയോഗിച്ച സ്‌കൂട്ടറും കസ്റ്റഡിയിലെടുത്തു. സിവില്‍ എക്‌സൈസ് ഓഫിസര്‍മാരായ കെ. ശ്രീജിത്ത്, ഷാജി അളോക്കന്‍, പ്രജീഷ് കോട്ടായി, പ്രനില്‍ കുമാര്‍, പി. ജലീഷ്, ഡ്രൈവര്‍ അജിത്ത് എന്നിവരാണ് എക്‌സൈസ് സംഘത്തിലുണ്ടായിരുന്നത്.