തിരൂരങ്ങാടി: ദാറുല്‍ഹുദാ ഇസ്‌ലാമിക് യൂനിവേഴ്‌സിറ്റിയുടെ സിബാഖ് ദേശീയ കലോത്സവത്തിന്റെ പ്രാഥമിക മത്സരങ്ങള്‍ക്ക് തുടക്കമായി. കേരളത്തിനകത്തും പുറത്തുമുള്ള മുപ്പത്തിരണ്ട് സ്ഥാപനങ്ങളില്‍നിന്നുള്ള 2600 ഓളം മത്സരാര്‍ഥികളാണ് മാറ്റുരയ്ക്കുന്നത്.

ബിദായ വിഭാഗം (സെക്കന്‍ഡറി ഒന്നാംവര്‍ഷം) പ്രാഥമിക മത്സരങ്ങള്‍ കോഴിക്കോട് കുറ്റിക്കാട്ടൂര്‍ ശംസുല്‍ഹുദാ ഇസ്‌ലാമിക് അക്കാദമിയില്‍ വൈകിട്ട് ഏഴിന് പാണക്കാട് സയ്യിദ് സാബിഖലി ശിഹാബ് തങ്ങള്‍ ഉദ്ഘാടനം ചെയ്തു. സാഹിത്യകാരന്‍ കെ.പി രാമനുണ്ണി മുഖ്യാതിഥിയായി. ഊലാ വിഭാഗം (സെക്കന്‍ഡറി രണ്ട്, മൂന്ന് വര്‍ഷം) മത്സരങ്ങള്‍ തൂത ദാറുല്‍ ഉലൂം ഇസ്‌ലാമിക് ദഅ്‌വാ കോളജില്‍ നടന്നു. പാണക്കാട് സയ്യിദ് മുനവ്വറലി ശിഹാബ് തങ്ങള്‍ ഉദ്ഘാടനം ചെയ്തു. അഡ്വ. നാലകത്ത് സൂപ്പി അധ്യക്ഷനായി.

സാനിയ വിഭാഗം (സെക്കന്‍ഡറി നാല്, അഞ്ച്) മത്സരങ്ങള്‍ കണ്ണൂര്‍ മാണിയൂര്‍ ബുസ്താനുല്‍ ഉലൂം കോളജില്‍ നടന്നു. സമസ്ത കേന്ദ്ര മുശാവറാംഗം മാണിയൂര്‍ അഹ്മദ് മൗലവിയുടെ അധ്യക്ഷതയില്‍ മന്ത്രി കടന്നപ്പളി രാമചന്ദ്രന്‍ ഉദ്ഘാടനം ചെയ്തു. സാനവിയ്യ വിഭാഗം (സീനിയര്‍ സെക്കന്‍ഡറി) മത്സരങ്ങള്‍ എടപ്പാള്‍ മാണൂര്‍ ദാറുല്‍ ഹിദായ ദഅ്‌വാ കോളജില്‍ സയ്യിദ് റാജിഹലി ശിഹാബ് തങ്ങള്‍ ഉദ്ഘാടനം ചെയ്തു. പ്രൊഫ. ആബിദ് ഹുസൈന്‍ തങ്ങള്‍ എം.എല്‍.എ മുഖ്യാതിഥിയായി. ആലിയ വിഭാഗം മത്സരങ്ങള്‍ 15,16 തിയതികളില്‍ കൂനഞ്ചേരി ദാറുന്നജാത്ത് ഇസ്‌ലാമിക് കോളജില്‍ നടക്കും. സിബാഖ് കലോത്സവത്തിന്റെ ഗ്രാന്‍ഡ് ഫിനാലെ 25 മുതല്‍ 28 വരെ വാഴ്‌സിറ്റി കാംപസിലാണ് നടക്കുന്നത്.