മുക്കം: വിദ്യാര്‍ഥികള്‍ക്ക് പരിചിതമല്ലാത്ത മഴമറ കൃഷിയിറക്കി മികച്ച വിളവ് നേടി കൊടിയത്തൂര്‍ പി.ടി.എം ഹൈസ്‌കൂള്‍ വിദ്യാര്‍ഥികള്‍. സ്‌കൂള്‍ സ്‌കൗട്ട് ആന്‍ഡ് ഗൈഡ്‌സ് വിദ്യാര്‍ഥികള്‍ അധ്യാപകരുടെ നേതൃത്വത്തില്‍ കൃഷിയിറക്കുകയായിരുന്നു.
കൃഷി വകുപ്പിന്റെ പച്ചക്കറി വികസന പ്രൊജക്റ്റ് ബെയ്‌സ് പദ്ധതി പ്രകാരം 86,000 രൂപ സബ്‌സിഡിയും ലഭിച്ചു. പയര്‍, തക്കാളി, കക്കിരി, കാബേജ്, കോളിഫ്‌ളവര്‍, പച്ചമുളക്, വഴുതിന തുടങ്ങിയവയാണ് കൃഷി ചെയ്തത്. രാവിലേയും വൈകിട്ടും വിദ്യാര്‍ഥികള്‍ തന്നെയാണ് കൃഷി പരിപാലിച്ചത്.
ഹൈസ്‌കൂള്‍ വിദ്യാര്‍ഥികള്‍ മഴ മറക്കുള്ളിലാണെങ്കില്‍ ഹയര്‍ സെക്കന്‍ഡറി വിദ്യാര്‍ഥികള്‍ സ്‌കൂള്‍ മുറ്റം തന്നെ കൃഷിയിടമാക്കി മാറ്റുകയായിരുന്നു. വിദ്യാര്‍ഥികളെ കാര്‍ഷികവൃത്തിയിലേക്ക് ആകര്‍ഷിക്കുന്നതിനായി ചെയ്ത കൃഷിയുടെ വിളവ് അവര്‍ക്ക് ഭക്ഷണത്തിന് തന്നെയാണ് ഉപയോഗിക്കുന്നത്. മുന്‍ വര്‍ഷങ്ങളില്‍ ചെയ്ത കൃഷിയില്‍ നിന്ന് ലഭിച്ച വിളവ് തന്നെയാണ് അവരെ ഇത്തവണയും കൃഷി ചെയ്യാന്‍ പ്രേരിപ്പിച്ചത്.