മട്ടാഞ്ചേരി: വല്ലാര്‍പാടം കണ്ടെയ്‌നര്‍  ട്രാന്‍ഷിപ്‌മെന്റ് ടെര്‍മിനല്‍ താരിഫ് നിരക്ക് കുറയ്ക്കാനൊരുങ്ങുന്നു. കോളംബോ, ദുബായ് ടെര്‍മിനലുകളില്‍ നിന്നും ആഭ്യന്തര തുറമുഖങ്ങളില്‍ നിന്നും ഇതര രാജ്യങ്ങളിലെ ചരക്ക് കണ്ടെയ്‌നറുകളെ ആകര്‍ഷിക്കുന്നതിന്റെ ഭാഗമായാണ് പുതിയ നീക്കം .

അടിസ്ഥാനസൗകര്യ വികസനം, കബോട്ടാഷ് നിയമ ഇളവ്, കണ്ടെയ്‌നര്‍ നീക്കത്തിനുള്ള സ മയനേട്ടം, കണ്ടെയ്‌നര്‍ സ്‌കാനര്‍ തുടങ്ങി ടെര്‍മിനലില്‍ ഒട്ടേറെ സൗകര്യങ്ങളൊരുക്കിയതിനു പിന്നാലെയാണ് കയറ്റിറക്കുമതി വ്യവസായമേഖലയെ ആകര്‍ഷിക്കുന്നതിന് ടെര്‍മിനല്‍ അധികൃതര്‍ സുപ്രധാന നീക്കത്തിനൊരുങ്ങുന്നത്. ടെര്‍മിനലിന് ഉയര്‍ന്ന താരിഫ് നിരക്കുകള്‍ ഏറെ തിരിച്ചടിയായി മാറിയിരുന്നു. 70,000 ടണ്ണേജ് 5,500 കണ്ടെയ്‌നര്‍ കപ്പാസിറ്റിയുള്ള ചരക്കു കപ്പല്‍ 12 മണിക്കൂര്‍ നങ്കൂരത്തിന് (വെസല്‍ റിലേറ്റഡ്ചാര്‍ജ് ) കൊച്ചിയില്‍ 87,347 ഡോളറാണ്. മുംബൈയിലിത് 34,014 ഡോളറും തുത്തുക്കുടിയില്‍ 56,371 ഡോളറും കോളംബോയില്‍ 19,418 ഡോളറുമാണ്. 2005ല്‍ തുടക്കമിട്ട് 2011 ഫെബ്രുവരിയില്‍ കമ്മിഷന്‍ ചെയ്ത വല്ലാര്‍പാടം ട്രാന്‍ഷിപ്‌മെന്റ് ടെര്‍മിനലിന്റെ ഒന്നാം ഘട്ടത്തിനായി 4,500 കോടി രൂപയാണ് കേന്ദ്ര സര്‍ക്കാര്‍ ചെലവഴിച്ചത്. 

പ്രതിവര്‍ഷം 10 ലക്ഷം കണ്ടെയ്‌നര്‍ എന്നതായിരുന്നു ലക്ഷ്യം. ഏട്ടു വര്‍ഷം പിന്നിട്ടിട്ടും 2019ല്‍ ആറു ലക്ഷമാണ് കൈകാര്യം ചെയ്തത്. നിലവില്‍ 34 ലക്ഷം കണ്ടെയ്‌നര്‍ കൈകാര്യം ചെയ്യാനുള്ള ശേഷിയുള്ളപ്പോഴാണിത്.

നിലവില്‍ വല്ലാര്‍പാടത്ത് എത്തുന്ന ത് 55 ശതമാനം മെയിന്‍ ലൈന്‍ വെസലുകളാണ്. കഴിഞ്ഞ നാലു വര്‍ഷമായി സമരമില്ലാ തുറമുഖമെന്ന സ്ഥിതിയും വല്ലാര്‍പാടത്തിന് ഗുണമായിട്ടുണ്ട്.