മാഡ്രിഡ്: സ്പാനിഷ് ലാ ലിഗയിലെ സൂപ്പര്‍ പോരാട്ടത്തില്‍ വിയ്യാറലിനെ റയല്‍ പരാജയപ്പെടുത്തി. രണ്ടിനെതിരേ മൂന്നു ഗോളുകള്‍ക്കായിരുന്നു റയലിന്റെ ജയം. ഗോള്‍ രഹിതമായ ആദ്യ പകുതിക്ക് ശേഷമാണ് അഞ്ചു ഗോളുകളും പിറന്നത്.
ആദ്യ പകുതിയില്‍ ഇരുടീമുകളും ചെറിയ മുന്നേറ്റങ്ങളുമായി കളം നിറഞ്ഞു കളിച്ചെങ്കിലും ഗോള്‍ രഹിതമായതിനാല്‍ വിരസമായിരുന്നു. രണ്ടാം പകുതി ആരംഭിച്ച് അഞ്ചു മിനുട്ടുകള്‍ക്കുള്ളില്‍ വിയ്യാറല്‍ മത്സരത്തിലെ ആദ്യ ഗോള്‍ നേടി. ട്രിഗോറസായിരുന്നു സ്‌കോറര്‍. ആറു മിനുട്ടുകള്‍ക്ക് ശേഷം സെഡ്രിക് ബക്കാമ്പു കൂടി സ്‌കോര്‍ ചെയ്തതോടെ റയല്‍ സമ്മര്‍ദത്തിലായി.
64ാം മിനുട്ടില്‍ ഗരത് ബെയ്‌ലിന്റെ ഗോളോടെയാണ് റയല്‍ മത്സരത്തിലേക്ക് തിരിച്ചെത്തിയത്. 10 മിനുട്ടുകള്‍ക്ക് ശേഷം ക്രിസ്റ്റ്യാനോ റൊണാള്‍ഡോ മികച്ച ഗോളോടെ ടീമിന് സമനില നേടിക്കൊടുത്തു. കളി അവസാനിക്കാന്‍ ഏഴു മിനുട്ട് ശേഷിക്കെ ആല്‍വാരോ മൊറാറ്റ ടീമിന്റെ വിജയ ഗോള്‍ നേടുകയായിരുന്നു.
ഇന്ററിനെ അട്ടിമറിച്ച് റോമ
മിലാന്‍: ഇറ്റാലിയന്‍ സീരി എയില്‍ വമ്പന്‍മാരായ ഇന്റര്‍മിലാനെ റോമ അട്ടിമറിച്ചു. ഒന്നിനെതിരേ മൂന്നു ഗോളുകള്‍ക്കാണ് റോമയുടെ ജയം. റാഡ്ജ നെയ്ന്‍ഗോളന്‍ ഇരട്ട ഗോള്‍ നേടിയപ്പോള്‍ പെരോറ്റി റോമയുടെ ശേഷിച്ച ഗോള്‍ സ്വന്തമാക്കി. ഐക്കാര്‍ഡിയാണ് ഇന്ററിന്റെ ആശ്വാസ ഗോള്‍ നേടിയത്.
പാരിസില്‍ ഗോള്‍ മഴ
പാരിസ്: ഫ്രഞ്ച് ലീഗ് വണ്ണില്‍ ഗോള്‍ മഴ പെയിച്ച് പാരിസ് സെന്റ് ജെര്‍മെയ്ന്‍. ഒന്നിനെതിരേ അഞ്ചു ഗോളുകള്‍ക്ക് ഒളിംപിക് മാര്‍സെല്ലെയെയാണ് പി.എസ്.ജി പരാജയപ്പെടുത്തിയത്. മാര്‍ക്വിനോസ്, എഡിന്‍സന്‍ കവാനി, ലൂക്കാസ്, ഡ്രാക്‌സ്‌ലര്‍, ബ്ലെയ്‌സ് മാറ്റിയൂഡി എന്നിവര്‍ പി.എസ്.ജിക്ക് വേണ്ടി സ്‌കോര്‍ ചെയ്തു.