നിലമ്പുര്‍: ബസില്‍ കടത്തുന്നതിനിടെ നിരോധിത പുകയില ഉല്‍പന്നങ്ങളുമായി ഉത്തര്‍പ്രദേശ് സ്വദേശികള്‍ പിടിയിലായി. ഉത്തര്‍പ്രദേശ് ഫരീദാബാദ് സ്വദേശി നൗഷാദ് (40), റഫീഖ് അഹമ്മദ് (35) എന്നിവരാണ് പിടിയിലായത്. മൈസൂരുവില്‍നിന്നു കടത്തിക്കൊണ്ടുവരികയായിരുന്ന നാലായിരത്തോളം പാക്കറ്റ് പുകയില ഉല്‍പന്നങ്ങളാണ് തമിഴ്‌നാട് ട്രാന്‍സ്‌പോര്‍ട്ട് ബസില്‍നിന്നു പിടികൂടിയത്. മലപ്പുറം പൂക്കോട്ടൂരില്‍ നിര്‍മാണത്തൊഴിലാളികളായി ജോലി നോക്കിവരികയാണിവര്‍.
പച്ചക്കറി വസ്തുക്കള്‍ക്കിടയില്‍ ഒളിപ്പിച്ചുകടത്താന്‍ ശ്രമിക്കുന്നതിനിടെയാണ് അറസ്റ്റിലായത്. എക്‌സൈസ് ഇന്റലിജന്‍സ് ഇന്‍സ്‌പെക്ടര്‍ ഇ. ജിനീഷ്, പ്രിവന്റീവ് ഓഫിസര്‍മാരായ കെ. ഫ്രാന്‍സിസ്, വി. മായിന്‍കുട്ടി, രവീന്ദ്രനാഥ്, യൂസുഫലി എന്നിവരും സിവില്‍ എക്‌സൈസ് ഓഫിസര്‍മാരായ മുകുന്ദ ഘോഷ്, രമേശ്, യുസുഫ് എന്നിവരും പരിശോധനാ സംഘത്തിലുണ്ടായിരുന്നു.