തിരുവനന്തപുരം: കോണ്‍ഗ്രസ് പ്രവര്‍ത്തകര്‍ക്കുനേരെ നിരന്തരം അക്രമം അഴിച്ചുവിടുന്ന സി.പി.എമ്മിന്റേത് രാഷ്ട്രീയ ഫാസിസ്റ്റ് ശൈലിയാണെന്ന് വി.എം സുധീരന്‍. ഭരണത്തിന്റെ തണലില്‍ അക്രമികള്‍ക്ക് സര്‍വ സംരക്ഷണവും നല്‍കുന്ന സമീപനമാണ് മുഖ്യമന്ത്രി സ്വീകരിച്ച് വരുന്നത്. ബി.ജെ.പിക്ക് വര്‍ഗീയ ഫാസിസ്റ്റ് ശൈലിയാണെങ്കില്‍ സി.പി.എമ്മിന് അക്രമഫാസിസ്റ്റ് ശൈലിയാണ്.
തങ്ങളുമായി യോജിക്കാന്‍ കഴിയാത്തവരെ സംഘപരിവാര്‍ എങ്ങനെയാണോ ആക്രമിക്കുന്നത് അതേരീതിയിലാണ് കേരളത്തില്‍ സി.പി.എം ആക്രമണം നടത്തുന്നത്. അക്രമങ്ങള്‍ തുടരുന്ന സാഹചര്യത്തില്‍ ഈ വിഷയം മുന്‍നിര്‍ത്തി ജനകീയ പ്രക്ഷോഭത്തിന്റെ പാതയിലേക്കു പോകുമെന്നും സുധീരന്‍ വ്യക്തമാക്കി.