ചവറ: പന്മന കാട്ടില്‍ മേക്കതില്‍ ക്ഷേത്രത്തിലെ സെക്രട്ടറിക്കു നേരെ ബൈക്കിലെത്തിയ മൂന്നംഗ ക്വട്ടേഷന്‍ സംഘത്തിന്റെ ആക്രമണം. ചിറ്റൂര്‍ പൊന്മന രേവതി വീട്ടില്‍ പ്രസന്നകുമാറി (66) നെയാണ് ബൈക്ക് തടഞ്ഞ് ക്വട്ടേഷന്‍ സംഘം ആക്രമിച്ചത്. ബൈക്കിന്റെ നമ്പര്‍ സ്റ്റിക്കറുപയോഗിച്ച് മറച്ചെത്തിയ ക്വട്ടേഷന്‍ സംഘം മാരകായുധങ്ങളുപയോഗിച്ചാണ് ആക്രമണം നടത്തിയത്.
ആക്രമണത്തില്‍ ഇരു കൈക്കും പുറത്തും പരുക്കേറ്റു. കമ്പിവടി കൊണ്ടുള്ള അടിയുടെ മൂന്ന് വലിയ പാടുകള്‍ പ്രസന്നകുമാറിന്റെ പുറത്ത് മുറിവുകളായിരിക്കുകയാണ്. ബുധനാഴ്ച രാത്രി 8.30 ഓടെ കെ.എം.എം.എല്‍ കമ്പനി സ്ഥലം ഏറ്റെടുത്ത പന്മനയിലെ ആളൊഴിഞ്ഞ സ്ഥലത്താണ് ആക്രമണമുണ്ടായത്. വീട്ടില്‍ നിന്നും സാധനങ്ങള്‍ വാങ്ങാനായി ഇടപ്പള്ളിക്കോട്ടയിലേക്ക് ബൈക്കില്‍ പോകവേ പ്രസന്നകുമാറിന്റെ ബൈക്ക് തടഞ്ഞ് മൂന്നംഘ ക്വട്ടേഷന്‍ സംഘം ആക്രമിക്കുകയായിരുന്നു.
ബഹളംവച്ചതോടെ അതുവഴി കടന്നു പോയ യാത്രക്കാര്‍ ഓടിക്കൂടിയതോടെ അക്രമികള്‍ രക്ഷപ്പെടുകയായിരുന്നുവെന്ന് പ്രസന്നകുമാര്‍ ചവറ പൊലിസില്‍ നല്‍കിയ പരാതിയില്‍ പറയുന്നു.
ആക്രമണത്തിനുപയോഗിച്ച കമ്പി വടികള്‍ സംഭവസ്ഥലത്ത് ഉപേക്ഷിച്ചിട്ടാണ് ആക്രമികള്‍ കടന്നു കളഞ്ഞത്. ക്ഷേത്രത്തിലെ ഭരണമാറ്റം സംബന്ധിച്ചുള്ള മുന്‍വൈരാഗ്യമാണ് ആക്രമണത്തിന് പിന്നിലെന്ന് പ്രസന്നകുമാര്‍ പറഞ്ഞു. സംഭവത്തില്‍ ചവറ പൊലിസ് കേസെടുത്തു. പരുക്കേറ്റ പ്രസന്നകുമാര്‍ കരുനാഗപ്പള്ളിയിലെ സ്വകാര്യ ആശുപത്രിയില്‍ ചികിത്സ തേടി.