നടുവണ്ണൂര്‍: സപ്ലൈകോ വഴി അങ്കണവാടിയില്‍ വിതരണം ചെയ്യുന്ന ശര്‍ക്കരയില്‍ മായം കണ്ടെത്തിയതിനെ തുടര്‍ന്ന് വിതരണവും ഉപയോഗവും നിര്‍ത്തി. നടുവണ്ണൂര്‍ ഒന്‍പതാം വാര്‍ഡില്‍ പുളിഞ്ഞോളി അങ്കണവാടിയില്‍ എത്തിച്ച ശര്‍ക്കരയിലാണു മായം കണ്ടെത്തിയത്.
വൈകിട്ട് കുട്ടികള്‍ക്ക് അരിപ്പായസം തയാറാക്കുന്നതിനായി ശര്‍ക്കര ചേര്‍ത്തപ്പോള്‍ പായസം റോസ് നിറത്തിലേക്കു മാറുകയായിരുന്നു. തുടര്‍ന്ന് ശര്‍ക്കരയുടെ ഉള്ളില്‍നിന്ന് ചുവന്ന ദ്രാവകം ഒലിച്ചിറങ്ങുന്നതായി ശ്രദ്ധയില്‍പെട്ടു. കൈയിലെടുത്ത് പരിശോധിച്ചപ്പോള്‍ കൈ ചുവന്നുപോകുകയും ചെയ്തു. ശര്‍ക്കരക്ക് പ്രത്യക്ഷത്തില്‍ നിറം മാറ്റമോ മറ്റു പ്രശ്‌നങ്ങളോ കാണാന്‍ കഴിഞ്ഞിരുന്നില്ല. വെള്ളത്തില്‍ തിളക്കുമ്പോഴാണ് പ്രത്യേക ദ്രാവകം പുറത്തേക്കു വരുന്നതെന്നു അധികൃതര്‍ പറയുന്നു.
അങ്കണവാടി ടീച്ചര്‍ വിവരമറിയിച്ചതിനെ തുടര്‍ന്ന് ഐ.സി.ഡി.എസ് സൂപ്പര്‍വൈസറും ഫുഡ് ഇന്‍സ്‌പെക്ടറും സ്ഥലത്തെത്തി. വിശദ പരിശോധനയ്ക്കായി ശര്‍ക്കര കോഴിക്കോട് ലാബിലേക്കയച്ചു. സപ്ലൈക്കോ വഴി ഗുണം കുറഞ്ഞ ഭക്ഷണസാധനങ്ങളാണ് വിതരണം ചെയ്യുന്നതെന്ന് രക്ഷിതാക്കള്‍ ആരോപിച്ചു.