പെരിന്തല്‍മണ്ണ: അലീഗഢ് മുസ്‌ലിം യൂനിവേഴ്‌സിറ്റി മലപ്പുറം കേന്ദ്രത്തിന്റെ ആറാമത് വാര്‍ഷികാഘോഷ പരിപാടികള്‍ ഇന്ന് പെരിന്തല്‍മണ്ണ കേന്ദ്രത്തില്‍ നടക്കും. കേന്ദ്രത്തിന്റെ ഭാവി പദ്ധതികള്‍ രൂപപ്പെടുത്തുന്നതിനുള്ള ഉന്നതതല ചര്‍ച്ച, പുതുതായി നിര്‍മിച്ച അക്കാദമിക്ക് ബ്ലോക്ക് നാലിന്റെയും വിപുലീകരിച്ച അക്കാദമിക് ബ്ലോക്ക് മൂന്നിന്റെയും ഉദ്ഘാടനം, ഓപ്പണ്‍ എയര്‍ സ്റ്റേജിന്റെ ഉദ്ഘാടനം, പി.ഡബ്ല്യിയു.ഡി അധികാരികളുമായുള്ള ചര്‍ച്ച, അധ്യാപക-വിദ്യാര്‍ഥി-ജീവനക്കാരുമായുള്ള ചര്‍ച്ചകള്‍, വാര്‍ഷികാഘോഷ പരിപാടികള്‍, യാത്രയയപ്പ് എന്നിവ നടക്കും.
അലീഗഢ് വൈസ് ചാന്‍സലര്‍ ലെഫ്റ്റനന്റ്  ജനറല്‍ സമീറുദ്ദീന്‍ ഷാ, പ്രോ. വൈസ് ചാന്‍സലര്‍ ബ്രിഗേഡിയര്‍ സയ്യിദ് അഹ്മദ് അലി, അലീഗഢ് കോര്‍ട്ട് മെമ്പര്‍ ഇ.ടി മുഹമ്മദ് ബഷീര്‍ എം.പി., മഞ്ഞളാംകുഴി അലി എം.എല്‍.എ., മുന്‍ എം.എല്‍.എ വി ശശികുമാര്‍, എക്‌സിക്യൂട്ടീവ് കൗണ്‍സില്‍ മെമ്പര്‍ അമീര്‍ അഹ്മദ് മണപ്പാട്ട്, പെരിന്തല്‍മണ്ണ മുനിസിപ്പല്‍ ചെയര്‍മാന്‍ എം മുഹമ്മദ് സലീം, കോര്‍ട്ട് മെമ്പര്‍ ഡോ. പി.എ ഇബ്രാഹീം ഹാജി, യൂനിവേഴ്‌സിറ്റി എന്‍ജിനിയര്‍ താരിഖ് നസീര്‍, മാസ്റ്റര്‍ പ്ലാന്‍ കമ്മിറ്റി ചെയര്‍മാന്‍ നദീം തരീന്‍, പഞ്ചായത്ത് പ്രസിഡന്റുമാരായ ആയിഷക്കുട്ടി (ഏലംകുളം), സിനി ടീച്ചര്‍ (ആലിപ്പറമ്പ്) എന്നിവര്‍ പങ്കെടുക്കുമെന്ന് കേന്ദ്രം ഡയറക്ടര്‍ പ്രൊഫ. കെ.എം അബ്ദുര്‍ റഷീദ് അറിയിച്ചു.