നരിക്കുനി: വീര്യമ്പ്രം ജിയോ എന്റര്‍പ്രൈസസ് നടത്തിവരുന്ന കൊയിലോട്ടപ്പാറ ക്വാറിയിലെ അനിയന്ത്രിത ഖനനത്തിനെതിരേ സംരക്ഷണ സമിതിയുടെ ആഭിമുഖ്യത്തില്‍ വീര്യമ്പ്രം അങ്ങാടിയില്‍ പൊതുയോഗം നടത്തി. മലബാര്‍ പരിസ്ഥിതി സംരക്ഷണ സമിതി ചെയര്‍മാന്‍ ഭാസ്‌കരന്‍ വെള്ളൂര്‍ ഉദ്ഘാടനം ചെയ്തു. കൊയിലോട്ടപ്പാറ ക്വാറിയും പരിസരവും സന്ദര്‍ശിച്ച അദ്ദേഹം അനിയന്ത്രിത ഖനനം നേരില്‍ ബോധ്യപ്പെടുകയും പൊതുജനങ്ങള്‍ക്ക് അതിന്റെ പ്രത്യാഘാതനം മനസിലാക്കിക്കൊടുക്കുകയും ചെയ്തു.
എം. അബ്ദുറഹ്മാന്‍ മാസ്റ്റര്‍ അധ്യക്ഷനായി. അതേസമയം ക്വാറി പ്രവര്‍ത്തനം സ്റ്റോപ് മെമോ നല്‍കി നിര്‍ത്തിവച്ചിരിക്കുകയാണെന്ന അറിയിപ്പ് കഴിഞ്ഞ ദിവസം സംരക്ഷണ സമിതി കണ്‍വീനര്‍ക്ക് ലഭിച്ചിരുന്നു. എന്നാല്‍ ദിനേന ക്വാറിയില്‍ നിന്ന് ഖനനം നടക്കുന്നുണ്ട്. ഇന്നലെ കോഴിക്കോട് പൊല്യൂഷന്‍  കണ്‍ട്രോള്‍ ബോര്‍ഡിലെ ഉദ്യോഗസ്ഥര്‍ ക്വാറി സന്ദര്‍ശിക്കുകയും നിബന്ധനകള്‍ പാലിക്കുന്നില്ലെന്ന് ബോധ്യപ്പെട്ടതിനാല്‍ സംഭവം റിപ്പോര്‍ട്ട് ചെയ്യുമെന്ന് സമിതി അംഗങ്ങളെ അറിയിച്ചു. പൊതുയോഗത്തില്‍ വി.കെ മുഹമ്മദ് റഷീദ് സംസാരിച്ചു. കെ.ഇ ഷൈജു സ്വാഗതവും ടി. അഷ്‌റഫ് നന്ദിയും പറഞ്ഞു.
പഞ്ചായത്ത് നല്‍കിയ ലൈസന്‍സ് റദ്ദ് ചെയ്യണമെന്നാവശ്യപ്പെട്ട് സംരക്ഷണ സമിതിയുടെ ആഭിമുഖ്യത്തില്‍ മാര്‍ച്ച് നാലിന് ഉണ്ണികുളം പഞ്ചായത്ത് ഓഫിസിന് മുന്നില്‍ ധര്‍ണ  സംഘടിപ്പിക്കാനും തീരുമാനിച്ചു.