കൊപ്പം: കൊപ്പം-വളാഞ്ചേരി റോഡില്‍ ഇന്നലെ നടന്ന വ്യത്യസ്ത അപകടങ്ങളില്‍ ഇരുചക്രവാഹന യാത്രികര്‍ക്ക് പരുക്കേറ്റു. രാവിലെ കൊപ്പം പള്ളിക്കുസമീപം നായ കുറുകെ ചാടിയതിനെത്തുടര്‍ന്ന് ഇരുചക്ര യാത്രികര്‍ക്ക് നിസാര പരുക്കുപറ്റി. പുലാശ്ശേരി വൈദ്യര്‍പടി ബസ് സ്റ്റോപ്പിനു സമീപം ബസും ബൈക്കും തമ്മിലുണ്ടായ അപകടത്തില്‍ വെളുത്തൂര്‍ സ്വദേശിയായ ബൈക്ക് യാത്രികനെ പെരിന്തല്‍മണ്ണയിലെ സ്വകാര്യ ഹോസ്പിറ്റലിലും പുലാശ്ശേരി വെല്‍ഫെയര്‍ സ്‌കൂളിനുസമീപം ബൈക്ക് ഓട്ടോയുടെ പുറകെ ഇടിച്ചതിനെത്തുടര്‍ന്ന് കയ്യിന് പരുക്കേറ്റ തെക്കുംമല സ്വദേശിയെ വളാഞ്ചേരിയിലെ ഹോസ്പിറ്റലിലും പ്രവേശിപ്പിച്ചു. നടുവട്ടത്ത് ബൈക്കുകള്‍ കൂട്ടിയിടിച്ചതിനെത്തുടര്‍ന്ന് ബൈക്ക് യാത്രികര്‍ക്ക് നിസാര പരിക്കേല്‍ക്കുകയും ചെയ്തു.
വാഹനങ്ങളുടെ അമിതവേഗതയാണ് അപകടങ്ങള്‍ക്ക് കാരണമായതെന്ന് ദൃക്‌സാക്ഷികള്‍ പറയുന്നു. കൊപ്പം വളാഞ്ചേരി റൂട്ടില്‍ ബസുകാരുടെ അമിതവേഗതയെ കുറിച്ച് പലപ്പോഴും ജനങ്ങളില്‍നിന്ന് പരാതി ഉയര്‍ന്നിട്ടുണ്ട്. മിക്ക അപകടങ്ങളിലും ഒരു ഭാഗത്ത് ബസായിരിക്കും.
ബൈക്ക് യാത്രികരുടെ അശ്രദ്ധയും അമിത വേഗതയും അപകടങ്ങള്‍ക്കും ജീവഹാനിക്കും കാരണമാകാറുണ്ട്. കഴിഞ്ഞ മാസം വിയറ്റ്‌നാംപടി പള്ളിക്ക് മുന്നില്‍ ബൈക്ക് യാത്രികന്‍ അപകടത്തെത്തുടര്‍ന്ന് മരണപ്പെട്ടിരുന്നു. മറ്റൊരു വാഹനത്തെ മറികടക്കുന്നതിനിടയിലായിരുന്നു അപകടം സംഭവിച്ചത്. ബൈക്ക് യാത്രക്കാരയ യുവാക്കളുടെ അമിതവേഗതയും ഹെല്‍മെറ്റ് ഉപയോഗിക്കാത്തതും അപകടങ്ങള്‍ക്കും ജീവഹാനിക്കും കാരണമാകുന്നു.