മക്ക: ഹജ്ജ് സീസണിൽ പുണ്യ സ്ഥലങ്ങളിലെ യാത്രകൾ  സുഖകരമാക്കുന്നതിനു പുതിയ പദ്ധതികൾ പ്രഖ്യാപിച്ചു. മക്കയിൽ ചേർന്ന ഹജ്ജ്, ഉംറ അധികൃതരുടെ യോഗത്തിലാണ് കാൽനട യാത്രയും ബസ് യാത്രയുമടക്കം  സുഖകരമാക്കാനുള്ള പുതിയ പദ്ധതി നടപ്പിലാക്കാൻ തീരുമാനിച്ചത്. ഇതിനായി പുണ്യസ്ഥലങ്ങളില്‍ നാലു ഗതാഗത പദ്ധതികള്‍ നടപ്പാക്കുന്നുണ്ട്. പുണ്യ സ്ഥലങ്ങളിലേക്ക് തീർത്ഥാടകർ കാൽനടയായും ബസുകളിലും പോകുമ്പോൾ ഉണ്ടാകുന്ന ബുദ്ധിമുട്ടുകളും തിരക്കുകളും ഒഴിവാക്കി യാത്രകൾ സുഖകരമാക്കാനായി കാല്‍നട യാത്രക്കാരുടെ പാതകളേയും ബസുകള്‍ കടന്നുപോകുന്ന റോഡുകളെയും പൂര്‍ണമായും വേര്‍തിരിക്കാനാണ് ശ്രമം.     

 

          ഇതിനായി അറഫക്ക് പടിഞ്ഞാറ് വാദി അര്‍നക്കു മുകളിലൂടെ നിര്‍മിച്ച സൂഖുല്‍ അറബിലെ 62-ാം നമ്പര്‍ റോഡ് മേല്‍പാലം വികസിപ്പിച്ച് ഈ പാലത്തെ വടക്കു ഭാഗത്ത് കാല്‍നട യാത്രക്കാര്‍ക്കുള്ള ആറാം നമ്പര്‍ റോഡുമായി ബന്ധിപ്പിക്കും. വാദി അര്‍നക്കു മുകളിലൂടെയുള്ള 56-ാം നമ്പര്‍ മേല്‍പാലം (അല്‍ജൗഹറ) വികസിപ്പിച്ച് തെക്കു ഭാഗത്ത് കാല്‍നട യാത്രക്കാര്‍ക്കുള്ള ഒന്നാം നമ്പര്‍ റോഡുമായും ബന്ധിപ്പിക്കും. ഇതിന് പുറമെ മുസ്ദലിഫയില്‍ നിന്ന് ഷട്ടില്‍ സര്‍വീസ് നടത്തുന്ന ബസുകള്‍ക്ക് വേഗത്തില്‍ അറഫയിലേക്ക് മടങ്ങുന്നതിന്  മേല്‍പാലവും നാലു സ്ലോപ്പ് റോഡുകളും നിര്‍മിക്കുന്നതിനു പുറമെ മുസ്ദലിഫയിലെ എമര്‍ജന്‍സി റോഡിന്റെ നീളം കൂട്ടുന്നതിനും പദ്ധതിയുണ്ട്.