കാസര്‍കോട്: കാര്‍ തടഞ്ഞുനിര്‍ത്തി സ്വര്‍ണ വ്യാപാരിയെ കൊള്ളയടിച്ച സംഭവത്തില്‍ യുവാവ് അറസ്റ്റില്‍. മട്ടന്നൂര്‍ ഇരിങ്ങല്‍ മൂലയിലെ മുഹമ്മദ് നൗഫലി (23) നെയാണ് വിദ്യാനഗര്‍ പൊലിസ് പിടികൂടിയത്. ഇയാളെ കാസര്‍കോട് ജുഡീഷ്യല്‍ മജിസ്‌ട്രേറ്റ് കോടതിയില്‍ ഹാജരാക്കി.
2016 ഓഗസ്റ്റ് ഏഴിന് രാത്രി ചെര്‍ക്കള തെക്കില്‍ വളവില്‍വച്ചാണ് കേസിനാസ്പദമായ സംഭവം. മഹാരാഷ്ട്ര സ്വദേശിയും വര്‍ഷങ്ങളായി തലശ്ശേരിയില്‍ താമസക്കാരനുമായ ഗണേഷ് മോഹന്‍ സിത്താറാണ് കൊള്ളക്കിരയായത്. കേസിലെ മറ്റു പ്രതികളായ കൂത്തുപറമ്പയിലെ പി. സായൂജ് (32), നൗഷാദ് (45), മൃദുല്‍ (23) എന്നിവരെ പൊലിസ് നേരത്തെ അറസ്റ്റു ചെയ്തിരുന്നു. സ്വര്‍ണ വ്യാപാരിയുടെ കാര്‍ ഡ്രൈവര്‍ പ്രജീഷിന്റെ ഒത്താശയോടെയാണ് കൊള്ള നടത്തിയതെന്ന് പൊലിസ് കണ്ടെത്തിയത്.