ഇംഫാല്‍ലഖ്‌നോ: മനുഷ്യാവകാശ പ്രവര്‍ത്തക ഇറോം ശര്‍മിളയുടെ രംഗപ്രവേശത്തോടെ രാഷ്ട്രീയശ്രദ്ധ നേടിയ മണിപ്പൂരില്‍ നിയമസഭാ തെരഞ്ഞെടുപ്പിന്റെ ആദ്യഘട്ടം ഇന്ന് ആരംഭിക്കും. രണ്ടുഘട്ട തെരഞ്ഞെടുപ്പ് നടക്കുന്ന ആകെ 60 മണ്ഡലങ്ങളില്‍ 38 ഇടത്താണ് ഇന്ന് വിധിയെഴുത്ത് നടക്കുന്നത്. ആറാംഘട്ടത്തില്‍ ഇന്ന് 49 മണ്ഡലങ്ങളിലേക്കാണ് ഉത്തര്‍പ്രദേശില്‍ വോട്ടെടുപ്പ് നടക്കുന്നത്.
കനത്ത സുരക്ഷ ഏര്‍പ്പെടുത്തിയ മണിപ്പൂരില്‍ രാവിലെ ഏഴിന് തെരഞ്ഞെടുപ്പ് ആരംഭിക്കും. കിഴക്കന്‍ ഇംഫാല്‍, പടിഞ്ഞാറന്‍ ഇംഫാല്‍, ബിശ്‌നുപൂര്‍, മലയോര ജില്ലകളായ ചുരാചന്ദ്പൂര്‍, കങ്‌പോക്പി എന്നിവിടങ്ങളില്‍ ആകെ 1,643 പോളിങ് സ്റ്റേഷനുകളിലാണ് വോട്ടെടുപ്പ് നടക്കുന്നത്. 168 സ്ഥാനാര്‍ഥികള്‍ മത്സരരംഗത്തുണ്ട്. ആകെ 19,02,562 സമ്മതിദായകരാണ് സംസ്ഥാനത്തുള്ളത്. ഇതില്‍ 9,28,573 ആണ്‍ വോട്ടര്‍മാരും 9,73,989 സ്ത്രീ വോട്ടര്‍മാരുമാണുള്ളത്.
15 വര്‍ഷമായി സംസ്ഥാനത്ത് ഭരണം തുടരുന്ന മുഖ്യമന്ത്രി ഇബോബി സിങ്ങിന്റെ കോണ്‍ഗ്രസ് ഭരണം നിലനിര്‍ത്തുമെന്ന് അവകാശപ്പെടുമ്പോള്‍ സംസ്ഥാനത്ത് പുതിയ തരംഗമുണ്ടാകുമെന്ന് ബി.ജെ.പി വാദിക്കുന്നു. എന്നാല്‍, സംസ്ഥാന-കേന്ദ്ര സര്‍ക്കാരുകളുടെ ജനവിരുദ്ധ നയങ്ങള്‍ക്കെതിരേയുള്ള ജനവിധിയാകും തെരഞ്ഞെടുപ്പെന്ന് ഇറോം ശര്‍മിളയുടെ പ്രജാ പാര്‍ട്ടി അവകാശപ്പെടുന്നു.
യുനൈറ്റഡ് നാഗാ കൗണ്‍സില്‍ സംസ്ഥാനത്തിനുമേല്‍ ചുമത്തിയ സാമ്പത്തിക ഉപരോധമാണ് തെരഞ്ഞെടുപ്പ് പ്രചാരണരംഗത്ത് പ്രധാനമായും ചര്‍ച്ചയായത്. ഇതിനെ തകര്‍ക്കുന്നതില്‍ കോണ്‍ഗ്രസ് സര്‍ക്കാര്‍ പരാജയപ്പെട്ടുവെന്നു പ്രതിപക്ഷ കക്ഷികള്‍ ആരോപിക്കുന്നു. ഇതിനുപുറമെ, സംസ്ഥാനത്തെ വികസനമുരടിപ്പ്, അഴിമതി, സര്‍ക്കാര്‍ ഫണ്ടുകളുടെ ദുരുപയോഗം, വഷളായിക്കൊണ്ടിരിക്കുന്ന ക്രമസമാധാനനില എന്നിവയെല്ലാം പ്രചാരണത്തില്‍ വിഷയമായി.
രാഹുല്‍ ഗാന്ധി അടക്കമുള്ള മുതിര്‍ന്ന കോണ്‍ഗ്രസ് നേതാക്കളും പ്രധാനമന്ത്രി നരേന്ദ്ര മോദി, രാജ്‌നാഥ് സിങ് അടക്കമുള്ള ബി.ജെ.പി ദേശീയ പ്രമുഖരും സംസ്ഥാനത്ത് പ്രചാരണത്തിനെത്തിയിരുന്നു.
തൗബാല്‍ മണ്ഡലത്തില്‍ മുഖ്യമന്ത്രി ഇബോബി സിങ്ങിനെതിരേ മത്സരിക്കുന്ന ഇറോം ശര്‍മിളയിലാണ് എല്ലാ കണ്ണുകളുമുള്ളത്. മണിപ്പൂരിലെ സൈനിക അമിതാധികാരത്തിനെതിരേ ലോക ശ്രദ്ധയാകര്‍ഷിച്ച 16 വര്‍ഷംനീണ്ട നിരാഹാരസത്യഗ്രഹം അവസാനിപ്പിച്ച് കഴിഞ്ഞ വര്‍ഷം രാഷ്ട്രീയത്തില്‍ പ്രവേശിച്ച അവര്‍ പീപ്പിള്‍സ് റിസര്‍ജന്‍സ് ആന്‍ഡ് ജസ്റ്റിസ് അലയന്‍സ്(പ്രജാ) എന്ന പേരില്‍ പുതിയ പാര്‍ട്ടി രൂപീകരിച്ചു മത്സരരംഗത്തുണ്ട്. കന്നി രാഷ്ട്രീയ അങ്കത്തില്‍ അഞ്ചിടത്ത് മാത്രമാണ് പാര്‍ട്ടി മത്സരിക്കുന്നതെങ്കിലും ഇറോം ശര്‍മിള അത്ഭുതങ്ങള്‍ സൃഷ്ടിക്കുമോയെന്നാണ് എല്ലാവരും ഉറ്റുനോക്കുന്നത്.
നൂറിലേറെ ശതകോടീശ്വരന്മാരും ക്രിമിനലുകളും മത്സരരംഗത്തുള്ള ഉത്തര്‍പ്രദേശിലെ ആറാംഘട്ടത്തില്‍ 1.72 കോടി വോട്ടര്‍മാരാണ് ഇന്ന് വിധിയെഴുതുന്നത്. ഇതില്‍ 77.84 ലക്ഷം സ്ത്രീകളും 94.60 ലക്ഷം പുരുഷന്മാരുമാണ്. ആകെ 635 സ്ഥാനാര്‍ഥികളാണു മത്സരരംഗത്തുള്ളത്.
എസ്.പി നേതാവ് മുലായം സിങ് യാദവിന്റെ അഅ്‌സംഗഢ്, വിവാദ ബി.ജെ.പി നേതാവ് യോഗി ആദിത്യനാഥിന്റെ ഗോരഖ്പൂര്‍ തുടങ്ങിയ ലോക്‌സഭാ മണ്ഡലങ്ങള്‍ ഈ പരിധിയിലാണു വരുന്നത്. കഴിഞ്ഞ തവണ 49 മണ്ഡലങ്ങളില്‍ 27 ഇടത്ത് എസ്.പിയും ഒന്‍പതിടത്ത് ബി.എസ്.പിയും ഏഴിടത്ത് ബി.ജെ.പിയും നാലിടത്ത് കോണ്‍ഗ്രസും രണ്ടിടത്ത് സ്വതന്ത്രരുമാണു വിജയിച്ചത്.