തിരൂരങ്ങാടി: ദാറുല്‍ഹുദ ഇസ്‌ലാമിക് യൂനിവേഴ്‌സിറ്റിയില്‍ നടക്കുന്ന സിബാഖ് ദേശീയ കലോത്സവത്തില്‍ മാറ്റുരയ്ക്കാനായി ഇതര സംസ്ഥാന വിദ്യാര്‍ഥികളുടെ സംഘം കേരളത്തിലേക്ക് തിരിച്ചു.
ദാറുല്‍ഹുദയുടെ ആസാം കാംപസിലെ നാല്‍പതോളം വിദ്യാര്‍ഥികളും, പശ്ചിമ ബംഗാള്‍ കാംപസിലെ അന്‍പതോളം വിദ്യാര്‍ഥികളും അധ്യാപകരും അടങ്ങുന്ന ആദ്യസംഘം ട്രെയിന്‍ മാര്‍ഗമാണ് യാത്ര തിരിച്ചത്. അസം, പശ്ചിമ ബംഗാള്‍ കാംപസുകള്‍ക്ക് പുറമെ ആന്ധ്രപ്രദേശ്, മഹാരാഷ്ട്ര, കര്‍ണാടക തുടങ്ങിയ സംസ്ഥാനങ്ങളിലെ ദാറുല്‍ഹുദ കാംപസിലെ നൂറുകണക്കിന് വിദ്യാര്‍ഥികളാണ് നാലുദിനങ്ങളിലായി നടക്കുന്ന സിബാഖ് ദേശീയ കലോത്സവത്തില്‍ പങ്കെടുക്കാനായി വാഴ്‌സിറ്റിയിലെത്തുക. ദാറുല്‍ഹുദ ഇസ്‌ലാമിക് യൂനിവേഴ്‌സിറ്റിക്ക് കീഴില്‍ പ്രവര്‍ത്തിക്കുന്ന നാഷനല്‍ ഇന്‍സ്റ്റിറ്റ്യൂട്ട് ഫോര്‍ ഇസ്‌ലാം ആന്‍ഡ് കണ്ടമ്പററി സ്റ്റഡീസിന് (നിക്‌സ്) കീഴിലുള്ള എട്ടുസ്ഥാപനങ്ങളിലെ വിദ്യാര്‍ഥികള്‍ക്കായി പ്രത്യേക വിഭാഗത്തിലാണ് മത്സരങ്ങള്‍. ബിദായ (സെക്കന്‍ഡറി ഒന്നാംവര്‍ഷം), ഊലാ (സെക്കന്‍ഡറി രണ്ട്, മൂന്ന് ), ഥാനിയ (സെക്കന്‍ഡറി നാല്, അഞ്ച് ) എന്നീ വിഭാഗങ്ങളിലായി നടക്കുന്ന മത്സരങ്ങളില്‍ വിധികര്‍ത്താക്കളായി എത്തുന്നതും വിവിധ സംസ്ഥാനങ്ങളിലെ പ്രമുഖരാണ്.
ദാറുല്‍ഹുദാ കാംപസിലെ നാഷനല്‍ ഇന്‍സ്റ്റിറ്റ്യൂട്ട്, മഹാരാഷ്ട്രയിലെ മുംബൈ ഖുവ്വത്തുല്‍ ഇസ്‌ലാം അറബിക് കോളജ്, ആന്ധ്രപ്രദേശിലെ പുങ്കനൂര്‍ മന്‍ഹജുല്‍ഹുദ ഇസ്‌ലാമിക് കോളജ്, കര്‍ണാടകയിലെ മാടന്നൂര്‍ ദാറുന്നൂര്‍ ഇസ്‌ലാമിക് കോളജ്, കാശിപ്പട്ടണം നൂറുല്‍ഹുദ അറബിക് കോളജ്, ഹെഗലിലെ ദാറുല്‍ഹുദ സെന്റര്‍, ആസാം ഓഫ് കാംപസ്, പശ്ചിമ ബംഗാള്‍ കാംപസ് തുടങ്ങി എട്ടുസ്ഥാപനങ്ങളിലെ വിദ്യാര്‍ഥികളാണ് സിബാഖ് ഉര്‍ദു കലോത്സവത്തില്‍ പങ്കെടുക്കുക. നാളെ പരപ്പനങ്ങാടി റെയില്‍വേ സ്റ്റേഷനില്‍ മത്സരാര്‍ഥികള്‍ക്ക് വരവേല്‍പ്പൊരുക്കാനുള്ള തയാറെടുപ്പിലാണ് സംഘാടകര്‍.