ലണ്ടന്‍: പ്രീമിയര്‍ ലീഗ് ക്ലബായ കാര്‍ഡിഫ് സിറ്റിക്ക് വേണ്ടി കളിക്കുന്ന താരമായ എമിലിയാനോ സലയെ വിമാനാപകടത്തില്‍ കാണാതായി. ഫ്രഞ്ച് വ്യോമയാന അധികൃതരാണ് സല സഞ്ചരിച്ചിരുന്ന വിമാനത്തെ കുറിച്ച് ഒരുവിവരവും ലഭ്യമല്ലെന്ന കാര്യം അറിയിച്ചത്. സല സഞ്ചരിച്ച ചെറുവിമാനം ഇംഗ്ലീഷ് ചാനലിന് മുകളില്‍വച്ചാണ് കാണാതായത്. വിമാനം കണ്ടെത്താനുള്ള തിരച്ചില്‍ പുരോഗമിക്കുകയാണ്. ഫ്രഞ്ച് ക്ലബായ നാന്റെസില്‍ നിന്ന് ഈയിടെയാണ് 17 മില്യന്‍ യൂറോക്ക് സല കാര്‍ഡിഫ് സിറ്റിയിലെത്തിയത്. ബുണ്ടസ്‌ലിഗയിലും ഫ്രഞ്ച് ലീഗിലും കഴിവ് തെളിയിച്ച താരമാണ് 29 കാരനായ സല.