കൊച്ചി: അവിനാശിയില്‍ അപകടത്തില്‍ മരിച്ച കെ.എസ്.ആര്‍.ടി.സി ജീവനക്കാരായ ബൈജുവിനെയും ഗിരീഷിനെയും അത്രപെട്ടെന്ന് മലയാളികള്‍ക്കു മറക്കാനാവില്ല. മികവാര്‍ന്ന സേവനത്തിനു കഴിഞ്ഞവര്‍ഷം കെ.എസ്.ആര്‍.ടി.സി എം.ഡിയില്‍നിന്ന് അംഗീകാരം നേടിയവരാണ് ഇരുവരും. ഇവര്‍ 2018ല്‍ തങ്ങളുടെ ബസിലെ യാത്രക്കാരിയുടെ ജീവന്‍ രക്ഷിക്കാന്‍ ബസ് ആശുപത്രിയിലേക്ക് തിരിച്ചുവിടുകയും യാത്രക്കാരിയുടെ ബന്ധുക്കള്‍ വരുന്നതുവരെ കൂട്ടിരിക്കുകയും ചെയ്ത സംഭവം അന്നു സമൂഹമാധ്യമങ്ങളില്‍ നിറഞ്ഞുനിന്നിരുന്നു.
കണ്ടെയ്‌നര്‍ ലോറിയിടിച്ച കെ.എസ്.ആര്‍.ടി.സി വോള്‍വോ ബസിന്റെ ഡ്രൈവര്‍മാരിലൊരാളായ ബൈജുവായിരുന്നു അന്നു ബസ് ഓടിച്ചിരുന്നത്. 2018 ജൂണ്‍ മൂന്നിന് എറണാകുളത്തുനിന്നു പുറപ്പെട്ട ബംഗളൂരു വോള്‍വോ ബസില്‍ ഡ്രൈവറായിരുന്നു അദ്ദേഹം.
അസുഖബാധിതയായ യാത്രക്കാരിക്കു വേണ്ടിയായിരുന്നു അന്ന് ബസ് വേഗത്തില്‍ ആശുപത്രിയിലേക്കു കുതിച്ചത്. എന്നാല്‍ ആശുപത്രിയില്‍ വച്ച് യാത്രക്കാരിയുടെ ആരോഗ്യനില മോശമായതിനെ തുടര്‍ന്ന് ചികിത്സിക്കണമെങ്കില്‍ ആരെങ്കിലും കൂടെനില്‍ക്കണമെന്ന് ഡോക്ടര്‍മാര്‍ നിര്‍ദേശിച്ചു. മറ്റു യാത്രക്കാര്‍ പിന്മാറിയപ്പോള്‍ ഡ്രൈവര്‍ ബൈജുവാണ് ഇവര്‍ക്ക് കൂട്ടിരുന്നത്. രണ്ടാം ഡ്രൈവര്‍ ഗിരീഷിനോട് ബസ് ഓടിക്കാന്‍ പറയുകയും ചെയ്തു. പിന്നീട് ബന്ധുക്കള്‍ എത്തിയ ശേഷമാണ് ബൈജു ആശുപത്രി വിട്ടത്. ബൈജു തന്നെയാണ് ഇക്കാര്യം അന്നു സമൂഹമാധ്യമത്തില്‍ പങ്കുവച്ചത്. പോസ്റ്റ് വൈറലായതോടെ അന്നത്തെ എം.ഡി ടോമിന്‍ തച്ചങ്കരി ഇരുവരെയും കത്തിലൂടെ അഭിനന്ദനമറിയിച്ചിരുന്നു.