ഭുവനേശ്വര്‍: ഒഡീഷയിലെ ഭുവനേശ്വറില്‍ ടി.വി പൊട്ടിത്തെറിച്ച് യുവതി മരിക്കുകയും ഭര്‍ത്താവിനും മകള്‍ക്കും ഗുരുതരമായി പരുക്കേല്‍ക്കുകയും ചെയ്തു. ബബി നായിക് എന്ന യുവതിയാണ് മരിച്ചത്. ഭര്‍ത്താവ് ദിലേശ്വര്‍ നായികും ആറര വയസുകാരിയായ മകളുമാണ് പരുക്കുകളോടെ രക്ഷപ്പെട്ടത്. ഇന്നലെ രാത്രി മൂന്നുപേരും സീരിയല്‍ കണ്ടുകൊണ്ടിരിക്കെയായിരുന്നു അപകടം. ഷോര്‍ട്ട് സര്‍ക്യൂട്ടാണ് അപകടത്തിന് കാരണമെന്ന് പൊലിസ് പറഞ്ഞു.
ടി.വി പൊട്ടിത്തെറിക്കുന്ന ശബ്ദം കേട്ട് അയല്‍വാസികളും തുടര്‍ന്ന് പൊലിസും അഗ്നിശമനസേനയും എത്തി വൈദ്യുതിബന്ധം വിച്ഛേദിച്ച് രക്ഷാപ്രവര്‍ത്തനം നടത്തിയെങ്കിലും ഗുരുതരമായി പൊള്ളലേറ്റ യുവതിയെ രക്ഷിക്കാനായില്ല. ഭര്‍ത്താവിനെയും മകളെയും ഇസ്പാറ്റ് ജനറല്‍ ആശുപത്രിയില്‍ പ്രവേശിപ്പിച്ചു.