തിരുവനന്തപുരം: അഞ്ചല്‍ വെസ്റ്റ് ഗവണ്മെന്റ് ഹയര്‍ സെക്കന്ററി സ്‌കൂളിലെ പത്താംക്ലാസ് വിദ്യാര്‍ഥി  ആരോമല്‍ സത്യന്‍ തിരക്കഥ എഴുതി സംവിധാനം ചെയ്ത 'ചക്ക പറഞ്ഞ കഥ' എന്ന ഇരുപത് മിനിറ്റ് ദൈര്‍ഘ്യമുള്ള ഹ്രസ്വചിത്രം കൃഷി വകുപ്പുമന്ത്രി വി.എസ്. സുനില്‍കുമാര്‍ മൃഗസംരക്ഷണവകുപ്പ് മന്ത്രി കെ.രാജുവിന് നല്‍കി  പ്രകാശനം ചെയ്തു.
ചക്കയുടെ മഹത്വം മനസ്സിലാക്കിയ കുട്ടി ഒരൂ വീട്ടില്‍ ഒരു പ്ലാവ് എന്ന സന്ദേശം നല്‍കുകയും എല്ലാ വീട്ടിലും ഒരു പ്ലാവ് എന്ന ലക്ഷ്യത്തിലേക്ക് ഇറങ്ങിതിരിക്കുകയും ചെയ്യുന്നതാണ് ചിത്രം. ചക്കയെക്കുറിച്ചുള്ള മനോഹരമായ ഒരു ഗാനവും ഈ ചിത്രത്തിലുണ്ട്. കൊല്ലം, ആലപ്പുഴ, തിരുവനന്തപുരം ജില്ലകളിലെ കൃഷിഫാമുകളിലായിരുന്നു  ഷൂട്ടിങ്ങ്. കൃഷ്ണപ്രിയ, നീതുമോള്‍ അശ്വതി രംജീഷ്, സജിത എന്നിവരാണ് അഭിനേതാക്കള്‍. ആരോമലിന്റെ അനുജന്‍ അദ്വൈത് സത്യനും അഭിനയിച്ചിട്ടുണ്ട്. ചിത്രത്തിന്റെ ക്യാമറാമാന്‍ അഭിഷാനാണ്. ചക്കപ്പാട്ട് അശ്വതി രംജീഷാണ് പാടിയിരിക്കുന്നത്. ആരോമല്‍ തയ്യാറാക്കിയ 'മിഴിതുറക്കൂ' എന്ന ചിത്രത്തിന് കേരള ഫോറസ്റ്റ് പ്രൊട്ടക്ടീവ് സ്റ്റാഫ് അസോസിയേഷന്‍ പുരസ്‌ക്കാരം ലഭിച്ചിരുന്നു.
അഞ്ചല്‍ മന്നം എന്‍.എസ്.എസ്. കോളേജിലെ അധ്യാപകനായ ഡി. സത്യന്റെയും അധ്യാപികയായ സജിതകുമാരിയുടെയും മകനാണ്. ചടങ്ങില്‍ മുന്‍ എം.എല്‍.എ.പി.എസ്. സുപാല്‍ സന്നിഹിതനായിരുന്നു.