കൊല്ലം: കഴിഞ്ഞ സര്‍ക്കാരിന്റെ അവസാന കാലത്ത് കൊട്ടിഘോഷിച്ച് ഉദ്ഘാടനം ചെയ്ത ചിതറ പൊലിസ് സ്റ്റേഷന്‍ പ്രവര്‍ത്തനം ഇനിയും യാഥാര്‍ഥ്യമായില്ല. കെട്ടിടം ഇപ്പോഴും ഒഴിഞ്ഞു കിടക്കുകയാണ്. സ്റ്റേഷനു വേണ്ടി വളവുപച്ചയില്‍ പഞ്ചായത്ത് ഒരുക്കിയ കെട്ടിടത്തില്‍ ലോക്കപ്പില്‍ ഉള്‍പ്പെടെ തെരുവുനായ്ക്കളുടേയും സാമൂഹ്യ വരുദ്ധരുടേയും കേന്ദ്രമാണ്. പഞ്ചായത്ത് മുന്‍കൈയെടുത്താണ് പൊലിസ് സ്റ്റേഷന്‍ കെട്ടിടം പണി പൂര്‍ത്തിയാക്കിയത്. ചിതറ പഞ്ചായത്തിന്റെ ഉടമസ്ഥതയിലുള്ള സ്ഥലത്ത് നാട്ടുകാരില്‍ നിന്ന് പിരിവെടുത്താണ് പൊലിസ് സ്റ്റേഷനായി കെട്ടിടം നിര്‍മിച്ചത്. 2015ല്‍ അന്നത്തെ ആഭ്യന്തരമന്ത്രിയായിരുന്ന രമേശ് ചെന്നിത്തലയാണ് കെട്ടിടം ഉദ്ഘാടം ചെയ്തത്. പൊലിസ് ഓഫിസര്‍മാരും പങ്കെടുത്തിരുന്നു. പൊലിസ് സ്റ്റേഷന്റെ ബോര്‍ഡും സ്ഥാപിച്ചു. എന്നാല്‍ നാളിതുവരെ പൊലിസ് സ്റ്റേഷന്‍ പ്രവര്‍ത്തനം ആരംഭിച്ചിട്ടില്ല. 13 ദിവസത്തിനകം പൊലിസ് സ്റ്റേഷന്‍ പ്രവര്‍ത്തനം ആരംഭിക്കുമെന്നായിരുന്നു ഉദ്ഘാടനം ചെയ്തപ്പോള്‍ ആഭ്യന്തര മന്ത്രി പ്രഖ്യാപിച്ചത്.
ചിതറ പഞ്ചായത്ത് ഓഫിസ് കെട്ടിടം ഉദ്ഘാടനം ചെയ്യാനെത്തിയ അന്നത്തെ ആഭ്യന്തര മന്ത്രിയായിരുന്ന രമേശ് ചെന്നിത്തല വിസ്തൃതമായ കടയ്ക്കല്‍ പൊലിസ് സ്റ്റേഷന്‍ വിഭജിച്ച് പരിധിയിലെ അരിപ്പ, ചോഴിയക്കോട് ഉള്‍പ്പെടെയുള്ള മലയോര പ്രദേശങ്ങള്‍ ഉള്‍പ്പെടുത്തി വളവുപച്ചയില്‍ പൊലിസ് സ്റ്റേഷന്‍ ആരംഭിക്കുമെന്ന് പ്രഖ്യാപനം നടത്തി. കെട്ടിട സൗകര്യം ഒരുക്കി നല്‍കാമെന്നു പഞ്ചായത്ത് വാഗ്ദാനം നല്‍കുകയും പാലിക്കുകയും ചെയ്തു. ഐ.ജി ഉള്‍പ്പെടെയുള്ളവര്‍ സ്ഥലത്ത് എത്തി പരിശോധന നടത്തിയായിരുന്നു കെട്ടിടത്തിന്റെ നിര്‍മാണം. തുടര്‍ന്ന് നടപടികള്‍ പൂര്‍ത്തിയാകും മുമ്പെ നിയമസഭാ തെരഞ്ഞെടുപ്പിന് മുന്‍പ് സ്റ്റേഷന്റെ ഉദ്ഘാടനം നടത്തുകയായിരുന്നു. ഇത് വിനയാകുകയും ചെയ്തു. അന്ന് ആഭ്യന്തരവകുപ്പിന് ഉണ്ടായ വീഴ്ചയായിരുന്നു കാരണം. എന്നാല്‍ പ്രവര്‍ത്തനം ആരംഭിക്കാതെ ഒഴിഞ്ഞു കിടക്കുന്ന കെട്ടിടത്തില്‍ സാമൂഹ്യ വിരുദ്ധരുടെ ശല്യം രൂക്ഷമാണ്. ഓഫിസിലേക്ക് വാങ്ങിയ ഫര്‍ണിച്ചറുകള്‍ ഉള്‍പ്പെടെ പലതും തുരുമ്പെടുത്ത് നശിക്കുകയാണ്.
തെരഞ്ഞെടുപ്പ് കഴിഞ്ഞ് എല്‍.ഡി.എഫ് മന്ത്രിസഭ അധികാരത്തില്‍ വന്നിട്ടും പുതിയ പൊലിസ് സ്റ്റേഷന്‍ തുടങ്ങുന്നതിനു ജീവനക്കാരെ നിയമിക്കുന്നതുള്‍പ്പെടെയുള്ള നടപടിക്ക് അംഗീകാരം ലഭിച്ചില്ല. എല്‍.ഡി.എഫിന് താല്‍പര്യമില്ലാത്തതുകൊണ്ടാണ് സ്റ്റേഷന്‍ വരാത്തതെന്നാണ് കോണ്‍ഗ്രസുകാര്‍ ആരോപിക്കുന്നത്. ജില്ലയുടെ മലയോര മേഖലയായ ചിതറയില്‍ ഉടന്‍ പൊലിസ് സ്റ്റേഷന്‍ ആരംഭിക്കണണെന്ന് ആവശ്യപ്പെട്ട് ജനകീയ പ്രക്ഷോഭം ആരംഭിക്കാനാണ് കോണ്‍ഗ്രസിന്റെ തീരുമാനം.