അന്തിക്കാട്: ചേറ്റുപുഴ പടിഞ്ഞാറെ കോള്‍പടവില്‍ കഞ്ചാവ് ലഹരി മാഫിയ സംഘത്തിന്റെ അഴിഞ്ഞാട്ടം വ്യാപകമായതോടെ നാട്ടുകാരും കര്‍ഷകരും ഭീതിയിലായി. കഴിഞ്ഞ ദിവസം രാത്രിയില്‍ കോള്‍പടവിലെത്തിയ സംഘം ബണ്ട് റോഡില്‍ കൂട്ടിയിട്ടിരുന്ന ഉണങ്ങിയ കുളവാഴയ്ക്ക് തീവെച്ചു. തീ ആളിപ്പടര്‍ന്ന് സമീപത്തെ ഉണങ്ങിയ പുല്ലുകള്‍ വ്യാപകമായി കത്തി നശിച്ചു.
കോള്‍ പടവില്‍ നിന്ന് പുക ഉയരുന്നത് കണ്ട് ഓടിയെത്തിയ കര്‍ഷകരും പടവ് കമ്മിറ്റി ഭാരവാഹികളും ഏറെ പാടുപെട്ട് തീയണച്ചതിനാല്‍ വന്‍ ദുരന്തം ഒഴിവായി. കഞ്ചാവ് ലഹരി മാഫിയ സംഘങ്ങള്‍ രാത്രിയില്‍ കോള്‍പടവില്‍ തമ്പടിക്കുന്നത് പതിവായിട്ടുണ്ട്. പടവിലെത്തി കഞ്ചാവും മദ്യവും ഉപയോഗിക്കുന്ന സംഘം സമീപവാസികള്‍ക്കും ഭീഷണിയായിട്ടുണ്ട്.
സംഘത്തിന്റെ ശല്യം രൂക്ഷമായതോടെ നാട്ടുകാര്‍ രാത്രിയില്‍ പുറത്തിറങ്ങാന്‍ ഭയക്കുകയാണ്. ദൂരെ നിന്നുള്ളവരാണ് സംഘത്തിലുള്ള തെന്ന് സംശയിക്കുന്നു. കര്‍ഷകര്‍ക്കും നാട്ടുകാര്‍ക്കും ഭീഷണിയായ കഞ്ചാവ് ലഹരി മാഫിയ സംഘത്തെ പിടികൂടാന്‍ കോള്‍ പടവിലും പരിസര പ്രദേശങ്ങളിലും രാത്രി കാല പൊലിസ് പട്രോളിങ് ഏര്‍പ്പെടുത്തണമെന്ന് നാട്ടുകാര്‍ ആവശ്യപ്പെട്ടു.