കായംകുളം: സ്‌കൂട്ടര്‍ യാത്രക്കാരനായ മദ്‌റസ അധ്യാപകനെ ഇടിച്ചു പരിക്കേല്‍പ്പിച്ച കെ.എസ്.ആര്‍.ടി.സി ആഡംബര ബസ് നിര്‍ത്താതെ പോയി.
കാപ്പില്‍ റസിയ മന്‍സില്‍ ജബ്ബാര്‍ കുട്ടി മുസ്്‌ലിയാര്‍ (58 )ക്കാണ് പരുക്കേറ്റത്. ഇന്നലെ ഉച്ചക്ക് ഒരു മണിയോടെ ദേശിയ പാതയില്‍ ചിറക്കടവം ഹൈവേ പാലസ് ഹോട്ടലിന്റെ മുന്നിലായിരുന്നു അപകടം. തിരുവനന്തപുരത്ത് നിന്ന് കോയമ്പത്തൂരിലേക്ക് പോയ ആഡംബര ബസാണ് ഇടിച്ചത്. മറ്റൊരു ബസിനെ മറികടക്കാന്‍ ശ്രമിക്കുമ്പോഴാണ് ജബ്ബാര്‍ മുസ്്‌ലിയാരുടെ സ്‌കൂട്ടറില്‍ ഇടിച്ചത്.
ഇടിച്ചിട്ടശേഷം ബസ് നിര്‍ത്താതെ പോവുകയും ചെയ്തു. പിന്നീട് പിന്നാലെ വന്ന ടൂറിസ്റ്റ് ബസിലെ ജീവനക്കാരും നാട്ടുകാരും ചേര്‍ന്നാണ് കായംകുളം താലൂക്ക് ആശുപത്രിയില്‍ എത്തിച്ചത്. ഇടിയുടെ ആഘാതത്തില്‍ സ്‌കൂട്ടര്‍ പൂര്‍ണ്ണമായും തകര്‍ന്നു.
കരീല കുളങ്ങര പൂവടി ജുമാമസ്ജിദിലെ അസി.ഇമാമായ ഇദ്ദേഹം ജോലി കഴിഞ്ഞ് കാപ്പിലേക്ക് പോകുമ്പോഴായിരുന്നു അപകടം.