മാനന്തവാടി: സി.പി.എമ്മില്‍ ഭിന്നതക്ക് കാരണമായി വള്ളിയൂര്‍ക്കാവില്‍ പാരമ്പര്യേതര ട്രസ്റ്റി നിയമനം. സി.പി.എം ജില്ലാ കമ്മിറ്റിയംഗവും മണ്ഡലം എം.എല്‍.എയുമായ ഒ.ആര്‍ കേളുവിന്റെ അഭിപ്രായങ്ങള്‍ പരിഗണിക്കാതെ നടത്തിയ ട്രസ്റ്റി നിയമനമാണ് പാര്‍ട്ടിക്കുള്ളില്‍ വിവാദമാകുന്നത്.
മാനന്തവാടി സ്വദേശിയും വള്ളിയൂര്‍ക്കാവ് ഭഗവതി ക്ഷേത്രത്തിലെ നിത്യസന്ദര്‍ശകനുമായിരുന്നയാളെയാണ് പാരമ്പര്യേതര ട്രസ്റ്റി നിയമനത്തിനായി ഒ.ആര്‍ കേളു എം.എല്‍.എ ശുപാര്‍ശ ചെയ്തത്. സി.പി.എം മാനന്തവാടി ലോക്കല്‍, ഏരിയാ കമ്മിറ്റികള്‍ ഈ തീരുമാനം അംഗീകരിക്കുകയും ചെയ്തിരുന്നു. എന്നാല്‍ ഇവരുടെ തീരുമാനങ്ങളൊക്കെ തള്ളിയാണ് പനമരം സ്വദേശി ടി. രത്‌നാകരനെ പാരമ്പര്യേതര ട്രസ്റ്റിയായി നിയമിച്ചത്. അദ്ദേഹം ചൊവ്വാഴ്ച ചുമതല ഏറ്റെടുക്കുകയും ചെയ്തു. സി.പി.എം അനുഭാവിയും വ്യാപാരി വ്യവസായി സമിതി ജില്ലാ വൈസ് പ്രസിഡന്റുമാണ് ഇദ്ദേഹം.
പനമരം മുരിക്കന്മാര്‍ ദേവസ്വത്തിന്റെ ചെയര്‍മാനായും പ്രവര്‍ത്തിച്ചിട്ടുണ്ട്. പ്രത്യക്ഷമായി പാര്‍ട്ടി പ്രവര്‍ത്തനത്തില്‍ ഇല്ലെങ്കിലും എം.എല്‍.എ ശുപാര്‍ശ ചെയ്ത വ്യക്തിയും സി.പി.എം അനുഭാവിയാണ്.
വള്ളിയൂര്‍ക്കാവ് ഭഗവതി ക്ഷേത്രത്തിന്റെ ഉത്സവാഘോഷ കമ്മിറ്റിയില്‍ മൂന്നു വര്‍ഷം സെക്രട്ടറിയായും അഞ്ചു വര്‍ഷം എക്‌സിബിഷന്‍ ട്രേഡ് ഫെയര്‍ കമ്മിറ്റിയുടെ ജനറല്‍ കണ്‍വീനറായും ഇദ്ദേഹം പ്രവര്‍ത്തിച്ചിട്ടുണ്ട്. സി.പി.എം നിര്‍ദേശിക്കുന്ന ആള്‍ പാരമ്പര്യേതര ട്രസ്റ്റി ആവില്ലെന്ന് ബി.ജെ.പി പ്രവര്‍ത്തകര്‍ക്കിടയില്‍ സംസാരമുണ്ടായിരുന്നു. ഇത് സി.പി.എം പ്രവര്‍ത്തകര്‍ തള്ളിയിരുന്നെങ്കിലും പുതിയ ട്രസ്റ്റി എത്തിയതോടെ സി.പി.എം പ്രവര്‍ത്തകര്‍ വെട്ടിലായി.
അടുത്തിടെ ബി.ജെ.പി വിട്ട് സി.പി.എമ്മിലെത്തിയ ദേവസ്വം ബോര്‍ഡ് പ്രസിഡന്റിന്റെയും ചില ബി.ജെ.പി, ആര്‍.എസ്.എസ് നേതാക്കളുടെയും താല്‍പര്യമാണ് വള്ളിയൂര്‍ക്കാവ് പാരമ്പര്യേതര ട്രസ്റ്റി നിയമനത്തില്‍ നടന്നതെന്നാണ് സി.പി.എം അണികള്‍ക്കിടയില്‍ തന്നെയുള്ള ആരോപണം.
എല്‍.ഡി.എഫ് ഭരിക്കുമ്പോള്‍ തന്റെ വാക്ക് മുഖവിലയ്‌ക്കെടുക്കാതെ സര്‍ക്കാര്‍ നടത്തിയ നിയമനം എം.എല്‍.എക്കും നാണക്കേടായിരിക്കുകയാണ്.