തൃക്കരിപ്പൂര്‍: കൈക്കോട്ടുകടവ് പൂക്കോയ തങ്ങള്‍ സ്മാരക വൊക്കേഷണല്‍ ഹയര്‍ സെക്കന്‍ഡറി സ്‌കൂള്‍ കരിയര്‍ ഗൈഡന്‍സ് ആന്‍ഡ് കൗണ്‍സിലിങ് സെല്ലിന്റെ നേതൃത്വത്തില്‍ സംഘടിപ്പിച്ച സാധ്യം, നമുക്കും ക്യാംപ് ശ്രദ്ധേയമായി. ക്യാംപിന്റെ ഭാഗമായി ഹയര്‍ സെക്കന്‍ഡറി വിദ്യാര്‍ഥികള്‍ക്ക് തുടര്‍പഠന സാധ്യതകളെ കുറിച്ചും ന്യൂജെന്‍ പ്രോഗ്രാമുകളെ കുറിച്ചും അറിവും, തിരിച്ചറിവും നല്‍കുന്ന കരിയര്‍ മാപ്പിങ് സെഷന്‍ കേന്ദ്ര സര്‍വകലാശാല റിസര്‍ച്ച് സ്‌കോളറും കരിയര്‍ കോളമിസ്റ്റുമായ ഷെരീഫ് പൊവ്വല്‍ നയിച്ചു. രാജ്യത്തെ പ്രിമിയര്‍ ഇന്‍സ്റ്റിറ്റിയുട്ടുകളെ കുറിച്ചും തൊഴില്‍ സാധ്യതയുള്ള ധാരാളം ഹൃസ്വകാല പ്രോഗ്രാമുകളെ കുറിച്ചും ക്യാംപില്‍ വിവരിച്ചു.
ഫേസ് ടു ഫേസ് ക്യാംപിന്റെ ഭാഗമായി കേരള കേന്ദ്ര സര്‍വകലാശാല ജിനോമിക്‌സില്‍ റിസര്‍ച്ച് സ്‌കോളറായ ജംസീല്‍, നിസാര്‍ പട്ടുവം എന്നിവര്‍ നയിച്ച സെഷനില്‍ കുട്ടികള്‍ സംവദിച്ചു. പി.ടി.എ പ്രസിഡന്റ് കെ.പി മുഹമ്മദ് ക്യാംപ് ഉദ്ഘാടനം ചെയ്തു. പ്രിന്‍സിപ്പല്‍ എം. അബ്ദുല്‍ റഷീദ് അധ്യക്ഷനായി. സി.ജി.സി സെല്‍ കോര്‍ഡിനേറ്റര്‍ ടി.കെ അബൂസാലി, പി.പി ഷീന സംസാരിച്ചു.