റിയോ ഡി ജനീറോ: ഈ വര്‍ഷം ബ്രസീലില്‍ നടക്കാനിരിക്കുന്ന കോപ്പാ അമേരിക്കന്‍ ടൂര്‍ണമെന്റിനുള്ള ഗ്രൂപ്പുകള്‍ പ്രഖ്യാപിച്ചു.
ലാറ്റിനമേരിക്കയിലെ 10 ടീമുകള്‍ക്കൊപ്പം അതിഥികളായി ഏഷ്യയില്‍ നിന്ന് ജപ്പാന്‍, ഖത്തര്‍ എന്നിവരും അടുത്ത കോപ്പയില്‍ കളിക്കാനെത്തും. ജൂണ്‍ 14നാണ് മത്സരങ്ങള്‍ക്ക് തുടക്കമാകുന്നത്. ജൂലൈ ഏഴിന് ബ്രസീലിലെ പ്രശസ്തമായ മാരക്കാന സ്റ്റേഡിയത്തിലാണ് ഫൈനല്‍. ആതിഥേയരും മുന്‍ ജേതാക്കളുമായ ബ്രസീലും ബൊളീവിയയും തമ്മില്‍ സാവോപോളോയിലാണ് ഉദ്ഘാടന മത്സരം. ബൊളീവിയ, വെനിസ്വേല, പെറു എന്നിവര്‍ക്കൊപ്പം ഗ്രൂപ്പ് എയിലാണ് ബ്രസീലുള്ളത്.
കൊളംബിയ, പരാഗ്വേ, ഖത്തര്‍ എന്നിവര്‍ക്കൊപ്പം ഗ്രൂപ്പ് ബിയിലാണ് അര്‍ജന്റീനയുള്ളത്. നിലവിലെ റണ്ണറപ്പും കൂടിയാണ് അര്‍ജന്റീന. ഗ്രൂപ്പിലെ മൂന്ന് ടീമുകളും അര്‍ജന്റീനക്ക് കനത്ത വെല്ലുവിളി ഉയര്‍ത്തും. കഴിഞ്ഞ ലോകകപ്പിനു ശേഷം ടീമില്‍നിന്നു വിട്ടുനില്‍ക്കുന്ന ഇതിഹാസ താരം ലയണല്‍ മെസ്സി കോപ്പയിലെ മത്സരങ്ങള്‍ക്കായി തിരിച്ചെത്തിയേക്കും. ഉറുഗ്വേ, ഇക്വഡോര്‍, ജപ്പാന്‍, ചിലി എന്നിവര്‍ ഗ്രൂപ്പ് സിയിലാണ്.