സുല്‍ത്താന്‍ ബത്തേരി: അസൗകര്യങ്ങളുടെ നടുവില്‍ ഒരു റേഞ്ച് ഓഫിസ്. കല്ലുവയലില്‍ പ്രവര്‍ത്തിക്കുന്ന ബത്തേരി എക്‌സൈസ് റേഞ്ച് ഓഫിസാണ് അസൗകര്യങ്ങളുടെ നടുവില്‍ പ്രവര്‍ത്തിക്കുന്നത്. രണ്ട് പതിറ്റാണ്ടായി ഈ ഓഫിസ് ഇവിടെ പ്രവര്‍ത്തിക്കാന്‍ തുടങ്ങിയിട്ട്.
കാലപ്പഴക്കത്താല്‍ തകര്‍ച്ചയെ നേരിടുന്ന കെട്ടിടത്തിലാണ് എക്‌സൈസ് റേഞ്ച് ഓഫിസ് ഇപ്പോഴും പ്രവര്‍ത്തിക്കുന്നത്. ഫയലുകള്‍ സൂക്ഷിക്കാന്‍ വരെ ഇവിടെ സ്ഥലമില്ലന്നതാണ് വാസ്തവം.
തൊണ്ടിമുതലായി പിടികൂടുന്ന വാഹനങ്ങള്‍ കൊണ്ട് ഓഫിസ് പരിസരം നിറഞ്ഞിരിക്കുകയാണ്. ജില്ലയുടെ വിവിധ ഭാഗങ്ങളില്‍ നിന്നും എക്‌സൈസ് വകുപ്പ് തൊണ്ടിമുതലായി പിടികൂടുന്ന വാഹനങ്ങള്‍ ഒട്ടുമിക്കവയും ഇവിടെയാണ് സൂക്ഷിക്കുന്നത്.
ഇത്തരത്തില്‍ പിടികൂടി ഇവിടെയെത്തിച്ച വാഹനങ്ങളുടെ ലേലവും കഴിഞ്ഞ രണ്ട് വര്‍ഷമായി നടന്നിട്ടില്ല. ഓഫിസ് കുപ്പാടി പരിസരത്തേക്ക് മാറ്റുമെന്ന് പറയുന്നുണ്ടെങ്കിലും യാതൊരു നടപടികളും ഇതുവരെ ഉണ്ടായിട്ടില്ല. ബത്തേരി താലൂക്ക് മുഴുവന്‍ പ്രവര്‍ത്തിക്കേണ്ട എക്‌സൈസ് റേഞ്ച് ഓഫിസാണ് ഇത്തരത്തില്‍ അസൗകര്യങ്ങളുടെ നടുവില്‍ പ്രവര്‍ത്തിക്കുന്നത്.