എരിഞ്ഞിപുഴ: ഒളിയത്തടുക്കയില്‍ വീണ്ടും കാട്ടാനകളുടെ ആക്രമണം. കഴിഞ്ഞ ദിവസം രാത്രി നാട്ടിലിറങ്ങിയ കാട്ടാനക്കൂട്ടം വ്യാപകമായി കാര്‍ഷിക വിളകള്‍ നശിപ്പിച്ചു. ഒളിയത്തടുക്കയിലെ കെ. കൃഷ്ണന്‍ നായരുടെ തോട്ടത്തിലിറങ്ങിയ ആനക്കൂട്ടം മൂന്നു തെങ്ങുകളും നൂറോളം വാഴകളും നശിപ്പിച്ചു. തോട്ടത്തില്‍ ജലസേചനത്തിനായി ഉപയോഗിക്കുന്ന പൈപ്പുകളും തകര്‍ത്തെറിഞ്ഞു. മാധവന്‍ നായരുടെ നാലു തെങ്ങുകളും മൂന്നു കമുക്, വാഴ എന്നിവയും നശിപ്പിച്ചു. എട്ടോളം ആനകളാണ് കാടിറങ്ങി ജനവാസ കേന്ദ്രത്തിലെത്തിയത്.
നാട്ടുകാരും വിവരമറിഞ്ഞെത്തിയ വനപാലകരും ചേര്‍ന്ന് പടക്കം പൊട്ടിച്ചും പന്തം കത്തിച്ചും ആനക്കൂട്ടത്തെ കാടിനുള്ളിലേക്ക് തുരത്തി ഓടിക്കുകയായിരുന്നു. ഒരാഴ്ച മുന്‍പും ഈ പ്രദേശത്ത് കാട്ടാനക്കൂട്ടമെത്തി കാര്‍ഷിക വിളകള്‍ നശിപ്പിച്ചിരുന്നു. രണ്ടുദിവസം മുന്‍പ് ബേത്തൂര്‍പ്പാറയിലെ കാട്ടിപ്പാറയില്‍ ഇറങ്ങിയ കാട്ടാനകള്‍ കാര്‍ഷിക വിളകളും പരിസരത്തെ ദൈവസ്ഥാനത്തിന്റെ മതിലും തകര്‍ത്തിരുന്നു.
ആനകളെ ഉള്‍ക്കാട്ടിലേക്ക് തുരത്താന്‍ ആവശ്യമായ നടപടി അധികൃതര്‍ സ്വീകരിച്ചില്ലെങ്കില്‍ വരും ദിവസങ്ങളില്‍ കര്‍ഷകര്‍ വന്‍ നാശനഷ്ടം അനുഭവിക്കേണ്ടി വരുമെന്നാണ് പരിസരവാസികള്‍ പറയുന്നത്.