റാഞ്ചി: ഝാര്‍ഖണ്ഡ് മുക്തി മോര്‍ച്ച (ജെഎംഎം) നേതാവ് ഹേമന്ത് സോറന്‍ സര്‍ക്കാര്‍ രൂപീകരണത്തിനായി ഗവര്‍ണര്‍ സന്തോഷ് കുമാര്‍ ഗാംഗ്വാറിനെ കണ്ടു. ഇന്ത്യ സഖ്യ നേതാക്കള്‍ നിയമസഭാ തെരഞ്ഞെടുപ്പ് വിജയത്തിന് പിന്നാലെ തന്നെ നിയമസഭാ പാര്‍ട്ടി നേതാവായി സോറനെ ഏകകണ്ഠമായി തെരഞ്ഞെടുത്തിരുന്നു. ഈ മാസം 28ന് സോറന്‍ മുഖ്യമന്ത്രിയായി സത്യപ്രതിജ്ഞ ചെയ്യും.

'ഞാന്‍ സര്‍ക്കാര്‍ രൂപീകരിക്കാനുള്ള സഖ്യകക്ഷികളുടെ പിന്തുണ കത്ത് ഗവര്‍ണര്‍ക്ക് കൈമാറി. അദ്ദേഹം സര്‍ക്കാര്‍ രൂപീകരിക്കാന്‍ ഞങ്ങളെ ക്ഷണിച്ചു. നവംബര്‍ 28ന് സത്യപ്രതിജ്ഞാ ചടങ്ങ് നടക്കും' ഗവര്‍ണറെ കണ്ടതിന് ശേഷം സോറന്‍ മാധ്യമപ്രവര്‍ത്തകരോട് പറഞ്ഞു. ഗവര്‍ണര്‍ക്ക് സോറന്‍ രാജി സമര്‍പ്പിച്ചിരുന്നു. ഗവര്‍ണറുടെ നിര്‍ദ്ദേശപ്രകാരം സോറന്‍ ഇനി കാവല്‍ മുഖ്യമന്ത്രിയായി തുടരും.

ഝാര്‍ഖണ്ഡ് നിയമസഭാ തെരഞ്ഞെടുപ്പില്‍ ഹേമന്ത് സോറന്‍ ബാര്‍ഹെയ്ത് സീറ്റ് നിലനിര്‍ത്തിയിരുന്നു. ബിജെപി സ്ഥാനാര്‍ത്ഥി ഗാംലിയേല്‍ ഹെംബ്രോമിനെ 39,791 വോട്ടുകളുടെ ഭൂരിപക്ഷത്തില്‍ പരാജയപ്പെടുത്തിയാണ് സോറന്‍ സീറ്റ് നിലനിര്‍ത്തിയത്. 95,612 വോട്ടുകള്‍ സോറന് ലഭിച്ചപ്പോള്‍ ഹെംബ്രോമിന് 55,821 വോട്ടുകളാണ് ലഭിച്ചത്. ഝാര്‍ഖണ്ഡിലെ ഇന്ത്യന്‍ സഖ്യ നേതാവായി സോറനെ ഏകകണ്ഠമായി തെരഞ്ഞെടുത്തതായി കോണ്‍ഗ്രസ് നേതാവ് സുബോധ് കാന്ത് സഹായ് എഎന്‍ഐയെ അറിയിച്ചു.

Hemant Soren meets with the Governor to discuss government formation, ahead of the swearing-in ceremony scheduled for the 28th.