#നിസാര്‍ കലയത്ത്

ജിദ്ദ: വിപുലമായ സാംസ്‌കാരിക പരിപാടികളോടെ രാജ്യത്തെ ഇന്ത്യന്‍ പ്രവാസി സമൂഹം എഴുപതാമതു റിപ്ലബിക് ദിനം ആഘോഷിച്ചു. ജിദ്ദ കോണ്‍സുലേറ്റ് അങ്കണത്തില്‍ കോണ്‍സല്‍ ജനറല്‍ മുഹമ്മദ് നൂര്‍ റഹ്മാന്‍ ഷെയ്ഖ് മൂവര്‍ണ പതാക ഉയര്‍ത്തി. തുടര്‍ന്ന്, സ്ത്രീ ശാക്തീകരണം, പ്രവാസി വോട്ട്, സ്വച്ഛ് ഭാരത്, ശാസ്ത്ര സാങ്കേതിക വിദ്യയിലെ കുതിച്ചു ചാട്ടം തുടങ്ങി നേട്ടങ്ങള്‍ എണ്ണി പറഞ്ഞ രാഷ്ട്രപതിയുടെ റിപ്പബ്ലിക് ദിന സന്ദേശം അദ്ദേഹം സദസ്സിന് വായിച്ചു കേള്‍പ്പിച്ചു.
തുടര്‍ന്ന് സവിശേഷം കേക്ക് മുറിച്ചും, വിദ്യാര്‍ഥികള്‍ അവതരിപ്പിക്കുന്ന ദേശസ്‌നേഹ പ്രാധാന്യമുള്ള ഗാനങ്ങളാലപിച്ചും ജിദ്ദയിലെ റിപ്പബ്ലിക് ദിനാചരണം കേമമാക്കി. പൗരന്മാര്‍ക്ക് പുറമെ ഇന്ത്യയുടെ സുഹൃത്തുക്കളായ മറ്റു നാട്ടുകാരും ഉള്‍പ്പെടെ ആയിരത്തോളം പേര്‍ കോണ്‍സുലേറ്റിലെ പരിപാടിയില്‍ സംബന്ധിച്ചു.
ഇന്റര്‍നാഷണല്‍ ഇന്ത്യന്‍ സ്‌കൂള്‍ ബോയ്‌സ് വിഭാഗം മൈതാനിയില്‍ നടന്ന നിറപ്പകിട്ടാര്‍ന്ന റിപ്പബ്ലിക് ദിനാചരണ പരിപാടിയില്‍ കോണ്‍സല്‍ ജനറല്‍ മുഖ്യാതിഥി പങ്കെടുത്തു. വിദ്യാര്‍ഥികള്‍ അവതരിപ്പിച്ച മണിക്കൂറുകള്‍ നീളുന്ന കലാ പ്രകടനങ്ങളും ഡ്രില്ലുകളും പരേഡുകളും ആഘോഷത്തെ അവിസ്മരണീയമാക്കി.
റിയാദ് എംബസിയില്‍ രാവിലെ അംബാസഡര്‍ അഹമ്മദ് ജാവേദ് ദേശീയ പതാക ഉയര്‍ത്തി സഊദിയിലെ ഇന്ത്യന്‍ ജനത തനിക്ക് തന്ന സ്‌നേഹത്തിനും സഹകരണത്തിനും പ്രത്യേകം നന്ദി പറയുന്നു റിയാദിലെ തന്റെ അവസാനത്തെ റിപ്പബ്ലിക്ദിന സന്ദേശവും ആഘോഷവുമാണിത്. തന്റെ മൂന്ന് വര്‍ഷ കാലയളവില്‍ ഒരുപാട് നല്ല കാര്യങ്ങള്‍ ചെയ്യാന്‍ സാധിച്ചിട്ടുണ്ട് അതിനെല്ലാം ഇന്ത്യന്‍ കമ്മ്യൂണിറ്റിയോട് കടപെട്ടിരിക്കുന്നു. ഇവിടെയുള്ള ഇന്ത്യന്‍ കമ്മ്യൂണിറ്റി വളണ്ടിയര്‍മാരുടെ സേവനം പ്രത്യേകം അഭിനന്ദനം അര്‍ഹിക്കുന്നുവെന്നും അംബാസിഡര്‍ അഹമ്മദ് ജാവേദ് പറഞ്ഞു . കോണ്‍സുലര്‍ ഉദ്യോഗസ്ഥരും റിയാദിലെ നിരവധി ഇന്ത്യക്കാരും ചടങ്ങില്‍ പാങ്കെടുത്തു തുടര്‍ന്ന് വിവിധ കലാപരിപാടികളും നടന്നു. ദമാം ഇന്റര്‍നാഷണല്‍ സ്‌കൂളിന്റെ നേതൃത്വത്തിലായിരുന്നു ആഘോഷപരിപാടികള്‍. വാരാന്ത്യ അവധി ദിനമായതിനാല്‍ വന്‍ പങ്കാളിത്തമാണ് റിപ്പബ്ലിക്ക് ആഘോഷങ്ങള്‍ക്ക് സഊദിയില്‍ ഇത്തവണ ഉണ്ടായത്.