വാഷിങ്ടണ്‍: തെരഞ്ഞെടുപ്പ് കാലത്ത് ബറാക് ഒബാമ ഫോണ്‍ ചോര്‍ത്തിയെന്ന അമേരിക്കന്‍ പ്രസിഡന്റ് ഡോണാള്‍ഡ് ട്രംപിന്റെആരോപണത്തെ തള്ളി എഫ്.ബി.ഐ തലവന്‍. ട്രംപിന്റെ ആരോപണം തെറ്റാണെന്ന് പരസ്യമായി പ്രഖ്യാപിക്കണമെന്ന് ഡയറക്ടര്‍ ജെയിംസ് ബി കോമേ അമേരിക്കന്‍ നീതിന്യായ വകുപ്പിനോട് ആവശ്യപ്പെട്ടു. ഒരു യു.എസ് പൗരന്റേയും ഫോണ്‍ ചോര്‍ത്താന്‍ പ്രസിഡന്റിന് അധികാരമില്ലെന്നും അതിനാല്‍ ഫോണ്‍ ചോര്‍ത്തല്‍ പ്രായോഗികമല്ലെന്നും അദ്ദേഹം ചൂണ്ടിക്കാട്ടി.
വെള്ളിയാഴ്ചയാണ് പ്രസിഡന്റ് തെരഞ്ഞെടുപ്പ് പ്രചാരണം നടക്കുമ്പോള്‍ ബറാക് ഒബാമ തന്റെ ഫോണ്‍ ചോര്‍ത്തിയെന്ന് യു.എസ് പ്രസിഡന്റ് ഡോണള്‍ഡ് ട്രംപ് ആരോപണമുയര്‍ത്തിയത്. പ്രത്യേകിച്ച് തെളിവുകളൊന്നും പുറത്തുവിടാതെയാണ് ഗുരുതരമായ ആരോപണം ഉന്നയിച്ചത്. വിശുദ്ധമായ തെരഞ്ഞെടുപ്പ് പ്രക്രിയ നടക്കുന്നതിനിടെ ഒബാമ തന്റെ ഫോണ്‍ ചോര്‍ത്തിയെന്ന് ട്രംപ് ട്വിറ്ററില്‍ കുറിക്കുകയായിരുന്നു.