ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ സിറ്റിക്ക് ജയം. എവേ പോരാട്ടത്തില്‍ അവര്‍ സണ്ടര്‍ലാന്‍ഡിനെ മറുപടിയില്ലാത്ത രണ്ടു ഗോളുകള്‍ക്കു വീഴ്ത്തി. ഇരു പകുതികളിലായാണു സിറ്റിയുടെ ഗോളുകള്‍ പിറന്നത്. സെര്‍ജിയോ അഗ്യെറോ, ലെറോയ് സനെ എന്നിവര്‍ സിറ്റിക്കായി വല ചലിപ്പിച്ചു. 42ാം മിനുട്ടില്‍ അഗ്യെറോ ലീഡ് സമ്മാനിച്ചപ്പോള്‍ 59ാം മിനുട്ടില്‍ ജര്‍മന്‍ യുവ താരം സാനെ പട്ടിക പൂര്‍ത്തിയാക്കി. ജയത്തോടെ സിറ്റി 55 പോയിന്റുമായി മൂന്നാമത്. രണ്ടാമതുള്ള ടോട്ടനം ഹോട്‌സ്പറുമായി ഒറ്റ പോയിന്റ് വ്യത്യസം മാത്രമാണു സിറ്റിക്കുള്ളത്.

ഗ്രിസ്മാന്റെ ഇരട്ട ഗോളില്‍ അത്‌ലറ്റിക്കോ
മാഡ്രിഡ്: സ്പാനിഷ് ലാ ലിഗയില്‍ അത്‌ലറ്റിക്കോ മാഡ്രിഡിനു വിജയം. മറുപടിയില്ലാത്ത മൂന്നു ഗോളുകള്‍ക്ക് അവര്‍ വലന്‍സിയയെ വീഴ്ത്തി. ഫ്രഞ്ച് താരം അന്റോയിന്‍ ഗ്രിസ്മാന്‍ ഇരട്ട ഗോളുകള്‍ നേടിയപ്പോള്‍ ശേഷിച്ച ഗോള്‍ ഗമെയ്‌റോയുടെ വകയായിരുന്നു. കളിയുടെ 10, 83 മിനുട്ടുകളിലാണു ഗ്രിസ്മാന്‍ വല ചലിപ്പിച്ചത്. 48ാം മിനുട്ടിലായിരുന്നു ഗമെയ്‌റോയുടെ ഗോള്‍. ജയത്തോടെ 49 പോയിന്റുമായി അത്‌ലറ്റിക്കോ നാലാം സ്ഥാനം നിലനിര്‍ത്തി. മറ്റൊരു മത്സരത്തില്‍ അത്‌ലറ്റിക്കോ ബില്‍ബാവോ മറുപടിയില്ലാത്ത ഒറ്റ ഗോളിനു മലാഗയെ പരാജയപ്പെടുത്തി.

സുരക്ഷിതരായി
മൊണാക്കോ
പാരിസ്: പോരാട്ടം കനക്കുന്ന ഫ്രഞ്ച് ലീഗ് വണില്‍ മൊണാക്കോ ജയത്തോടെ ഒന്നാം സ്ഥാനം നിലനിര്‍ത്തി. നാന്റസിനെ എതിരില്ലാത്ത നാലു ഗോളുകള്‍ക്ക് തകര്‍ത്താണു മൊണാക്കോ വിജയം സ്വന്തമാക്കിയത്. ജയത്തോടെ മൊണാക്കോയ്ക്ക് 65 പോയിന്റുകള്‍. നിലവിലെ ചാംപ്യന്‍മാരായ പി.എസ്.ജിക്കും നീസിനും 62 പോയിന്റുകള്‍. ഗോള്‍ ശരാശരിയില്‍ പി.എസ്.ജി രണ്ടാമതും നീസ് മൂന്നാം സ്ഥാനത്തും നില്‍ക്കുന്നു.
ലാസിയോക്ക് ജയം
മിലാന്‍: ഇറ്റാലിയന്‍ സീരി എയില്‍ ലാസിയോക്ക് ജയം. 2-0ത്തിനു അവര്‍ ബോലോഗ്നയെ തകര്‍ത്തു. ഇമ്മോബീല്‍ ഇരട്ട ഗോള്‍ നേടിയാണു ലാസിയോക്ക് വിജയമൊരുക്കിയത്. ജയത്തോടെ അവര്‍ നാലാം സ്ഥാനത്ത്.