വെട്ടത്തൂര്‍: കാര്യാവട്ടം വെട്ടത്തൂര്‍ പാതയില്‍ തേലക്കാട് പൂവ്വക്കുണ്ടില്‍ മിനിലോറിയും ടിപ്പറും കൂട്ടിയിടിച്ച് മിനിലോറി ഡ്രൈവര്‍ക്ക് പരുക്കേറ്റു. മണ്ണാര്‍ക്കാട് നാട്ടുകല്‍ സ്വദേശി പിലാത്തറയ്ക്കല്‍ അനസി(23)നാണ് ഗുരുതരമായി പരുക്കേറ്റത്. ഇയാളെ പെരിന്തല്‍മണ്ണയിലെ സ്വകാര്യ ആശുപത്രിയില്‍ പ്രവേശിപ്പിച്ചു.
ഇന്നലെ രാവിലെ ഏഴോടെയാണ് അപകടം. പെരിന്തല്‍മണ്ണ ഭാഗത്തു നിന്നു കോഴിയുമായി വരികയായിരുന്ന മിനിലോറി എതിര്‍ദിശയില്‍ നിന്ന് വന്ന ടിപ്പറുമായി കൂട്ടിയിടിക്കുകയായിരുന്നു. ഇടിയുടെ ആഘാതത്തില്‍ മിനിലോറിയുടെ മുന്‍ഭാഗം പൂര്‍ണമായും തകര്‍ന്നു. തേലക്കാട് സ്വദേശിയായ ടിപ്പര്‍ ഡ്രൈവര്‍ നിസാരമായ പരുക്കുകളോടെ രക്ഷപ്പെട്ടു. അപകട കാരണം വ്യക്തമല്ല.