കാഞ്ഞങ്ങാട്: അശാസ്ത്രീയമായി നിര്‍മിച്ച കോട്ടച്ചേരി ട്രാഫിക് സര്‍ക്കിള്‍ പൊളിച്ചുമാറ്റി. നേരത്തെ തന്നെ ഓട്ടോഡ്രൈവര്‍മാരും യാത്രക്കാരും മറ്റുള്ളവരും വീതിയേറിയ ട്രാഫിക്ക് സര്‍ക്കിളും അശാസ്ത്രീയമായ സിഗ്നല്‍ ലൈറ്റ് സംവിധാനവും പൊളിച്ചുമാറ്റണമെന്നാവശ്യപ്പെട്ടിരുന്നു. 15 മീറ്റര്‍ ചുറ്റളവിലാണ് കോട്ടച്ചേരി ട്രാഫിക് സര്‍ക്കിള്‍ ഉണ്ടായിരുന്നത്. ഇവിടെ ട്രാഫിക് സിഗന്ല്‍ ലൈറ്റ് സ്ഥാപിച്ചതും അശാസ്ത്രീയമായിട്ടായിരുന്നു. ട്രാഫിക് സര്‍ക്കിളിന്റെ വലിപ്പക്കൂടുതല്‍ കാരണം ഒരു ഭാഗത്തുനിന്നു വാഹനങ്ങള്‍ കടന്നുപോകാനുള്ള സിഗ്നല്‍ അവസാനിക്കുമ്പോഴേക്കും വാഹനം മധ്യഭാഗത്തായിരിക്കും എത്തിയിട്ടുണ്ടാകുക.
ഇതിനിടയില്‍ മറു ഭാഗത്തുള്ള പച്ച സിഗ്നല്‍ തെളിയുകയും എതിര്‍ദിശയിലുള്ള വാഹനങ്ങളും ട്രാഫിക് സര്‍ക്കിളിന്റെ മധ്യഭാഗത്ത് അകപ്പെട്ട വാഹനങ്ങളും കൂട്ടിയിടിക്കുകയോ ഗതാഗത തടസമുണ്ടാകുകയോ ആണ് പതിവ്. ഇതോടെ നിലവിലുള്ള 15 മീറ്റര്‍ ചുറ്റളവില്‍ നിന്ന് മൂന്നു മീറ്റര്‍ വീതിയിലും 1.80 മീറ്റര്‍ നീളത്തിലും ട്രാഫിക് സര്‍ക്കിള്‍ പൊളിച്ചു മാറ്റാന്‍ കെ.എസ്.ടി.പി ധാരണയായിരുന്നു. സര്‍ക്കിള്‍ ദീര്‍ഘ വൃത്താകൃതിയിലാക്കാനായിരുന്നു പ്ലാന്‍. ഇതനുസരിച്ച് കെ.എസ്.ടി.പിയുടെ അംഗീകൃത കോണ്‍ട്രാക്ടര്‍മാരായ ആര്‍.ഡി.എഫ് കമ്പനി എന്‍ജിനീയറെ കൊണ്ട് പ്ലാന്‍ വരച്ചിരുന്നു. അത് അംഗീകാരത്തിനായി കെ.എസ്.ടി.പിക്ക് സമര്‍പ്പിച്ചിട്ടുമുണ്ട്. ഇതിനിടെയാണ് കാഞ്ഞങ്ങാട് നഗരസഭാ ചെയര്‍മാന്‍ നാടകീയ നീക്കത്തിലൂടെ ട്രാഫിക് സര്‍ക്കിള്‍ പൊളിച്ചുമാറ്റിയത്.
അതേസമയം, സര്‍ക്കിള്‍ ഇടിച്ചുപൊളിച്ചത് ലീഗിന്റെ രാഷ്ട്രീയ മൈലേജ് ഇല്ലാതാക്കാനാണെന്ന് ആക്ഷേപമുണ്ട്. സര്‍ക്കിള്‍ തിങ്കളാഴ്ച രാത്രി നഗരസഭാ ചെയര്‍മാന്‍ വി.വി രമേശന്റെയും കൗണ്‍സിലര്‍മാരുടെയും നേതൃത്വത്തില്‍ പൊളിച്ചുമാറ്റിയത് യൂത്ത് ലീഗ് നടത്താനിരുന്ന ധര്‍ണ സമരത്തെ പൊളിക്കാനാണെന്നാണ് ആരോപണം. ട്രാഫിക് റഗുലേറ്ററി കമ്മിറ്റിയും സംയുക്ത ഓട്ടോ തൊഴിലാളി യൂനിയനും നിരവധി തവണ ട്രാഫിക് സര്‍ക്കിളിന്റെ അശാസ്ത്രീയമായ നിര്‍മാണത്തെക്കുറിച്ചും ട്രാഫിക് സിഗ്നല്‍ ലൈറ്റ് സ്ഥാപിച്ചതിലെ അപാകതയെപ്പറ്റിയും പരാതികള്‍ പറഞ്ഞിരുന്നു.
കെ.എസ്.ടി.പി പദ്ധതി പൂര്‍ത്തിയാക്കി സര്‍ക്കാറിന് സമര്‍പ്പിച്ച ശേഷം എന്തു വേണമെന്നാലോചിക്കാമെന്നാണ് ചെയര്‍മാന്‍ പറഞ്ഞിരുന്നത്.