ചാലക്കുടി: ചാലക്കുടിയുടെ കാല്‍പന്തുകളി പെരുമയുമായി സന്തോഷ് ട്രോഫി ടീമിലേക്ക് ഒരു ചാലക്കുടിക്കാരന്‍ കൂടി. മുരിങ്ങൂര്‍ മണവാളന്‍ വീട്ടില്‍ ഡേവീസ്-മോളി ദമ്പതികളുടെ മകനായ ക്രിസ്റ്റി ഡേവീസാണ് ചാലക്കുടിക്ക് അഭിമാനമായി ഇത്തവണത്തെ കേരള ടീമില്‍ ഇടം നേടിയത്. കേരളവര്‍മ കോളജിലെ ബിരുദ വിദ്യാര്‍ഥിയായ ക്രിസ്റ്റി കാലിക്കറ്റ് യൂനിവേഴ്‌സിറ്റി ടീമംഗവും കൂടിയാണ്.
ചാലക്കുടി ഗവ.ബോയ്‌സ് ഹൈസ്‌കൂളിലെ പഠനകാലത്താണ് പന്തുകളിയോട് താല്‍പര്യമുണ്ടായത്.
ദേശീയതലത്തിലും സംസ്ഥാനതലത്തിലേക്കും നിരവധി കളിക്കാരെ സംഭാവന ചെയ്ത ബോയ്‌സ് ഗ്രൗണ്ടില്‍ നിന്നാണ് ക്രിസ്റ്റി ഫുട്‌ബോള്‍ കളിയുടെ ബാലപാഠങ്ങള്‍ അഭ്യസിച്ചത്.
സംസ്ഥാന സ്‌കൂള്‍ ടീമിലും ജില്ലാ ജൂനിയര്‍ ടീമിലും ജേഴ്‌സിയണിഞ്ഞിട്ടുണ്ട്. തുടര്‍ന്ന് കാലിക്കറ്റ് യൂനിവേഴ്‌സിറ്റി ടീമില്‍ ഇടംനേടി.
ഇപ്പോള്‍ സന്തോഷ് ട്രോഫി മത്സരത്തിനായി കേരളത്തിന്റെ ജേഴ്‌സിയണിയുകയാണ്.
കഴിഞ്ഞ വര്‍ഷം സന്തോഷ് ട്രോഫി കേരളം സ്വന്തമാക്കിയപ്പോള്‍ വിജയ ഗോള്‍ നേടിയ വിപിന്‍ തോമസ് ചാലക്കുടിക്കാരനാണ്. ഇത്തവണ ചാലക്കുടിയുടെ സാന്നിധ്യമറിയിക്കാന്‍ ക്രിസ്റ്റിയും മൈതാനത്തിറങ്ങും.