പന്തല്ലൂര്‍: ജനവാസ കേന്ദ്രത്തില്‍ ഇറങ്ങിയ പുലി ആടിനെ കടിച്ചു കൊന്നു.  പന്തല്ലൂര്‍ താലൂക്കിലെ മുള്ളന്‍ വയലിനു സമീപം വെള്ളരിയില്‍ സ്വദേശിയായ ആലിപ്പയുടെ ആടിനെയാണ് കൊന്നത്. വീടിനോട് ചേര്‍ന്നുള്ള കൂട്ടില്‍ നിന്നാണ് പുലി ആടിനെ ആക്രമിച്ചത്. കഴിഞ്ഞദിവസം രാത്രി കൂട്ടില്‍ നിന്ന് ആടുകളുടെ കരച്ചില്‍ കേട്ട് പുറത്തിറങ്ങി നോക്കിയപ്പോഴാണ് കൂട്ടില്‍ നിന്ന് പുലി ഓടുന്നത് കണ്ടത്.
തുടര്‍ന്ന് വനം വകുപ്പ് അധികൃതരെ വിവരമറിയിക്കുകയായിരുന്നു. ബിതൃക്കാട് റെയ്ഞ്ചര്‍ മനോഹരന്റെ നേതൃത്വലുള്ള വനപാലക സംഘം സ്ഥലത്തെത്തി പരിശോധന നടത്തി. പുലിയാണ് ആടിനെ ആക്രമിച്ചതെന്ന് വനം വകുപ്പ് സ്ഥീരീകരിച്ചു.
പുലി സാന്നിധ്യം സ്ഥിരീകരിച്ചതോടെ പ്രദേശത്ത് ഭീതി പടര്‍ന്നിരിക്കുകയാണ്. നാട്ടുകാര്‍ക്കും വളര്‍ത്തു മൃഗങ്ങള്‍ക്കും ഭീഷണി ഉയര്‍ത്തുന്ന പുലിയെ കെണി വെച്ച് പിടികൂടണമെന്ന ആവശ്യം ശക്തമായിരിക്കയാണ്.