തിരുവനന്തപുരം: ഏഴാം ക്ലാസ് വരെയുള്ള വിദ്യാര്‍ഥികള്‍ക്ക് ഓണം, ക്രിസ്മസ് പരീക്ഷകളുടെ മാര്‍ക്കിന്റെ ശരാശരി നോക്കി ഗ്രേഡ് നിശ്ചയിക്കും.
വാര്‍ഷിക പരീക്ഷ ഒഴിവാക്കിയ സാഹചര്യത്തിലാണ് തീരുമാനം.
എട്ടുവരെ ക്ലാസുകളില്‍ വിദ്യാര്‍ഥികളെ തോല്‍പ്പിക്കരുതെന്ന ചട്ടം ഇക്കുറിയും പാലിക്കും. ആരോഗ്യപരമായ കാരണങ്ങളാല്‍ കുട്ടിക്ക് വാര്‍ഷിക പരീക്ഷ എഴുതാന്‍ സാധിച്ചില്ലെങ്കില്‍ ഓണം, ക്രിസ്മസ് പരീക്ഷകളുടെ മാര്‍ക്ക് പരിഗണിക്കുകയാണ് നിലവിലെ രീതി.
ഈ മാനദണ്ഡമാണ് ഇത്തവണ എല്ലാ വിദ്യാര്‍ഥികള്‍ക്കുമായി നടപ്പാക്കാന്‍ വിദ്യാഭ്യാസ മന്ത്രിയുടെ അധ്യക്ഷതയില്‍ ചേര്‍ന്ന യോഗം തീരുമാനിച്ചത്.