കുളത്തുപ്പുഴ: കല്ലുവെട്ടാംകുഴി വിമലാലയത്തില്‍ നിന്നു സ്വര്‍ണവും പണവും കവര്‍ന്നു. കഴിഞ്ഞദിവസം രാത്രിയാണു മോഷണം നടന്നത്. ഓടുപൊളിച്ച് അകത്തുകടന്ന മോഷ്ടാവ് നാല് പവന്‍ സ്വര്‍ണവും 5,000 രൂപയുമാണു കവര്‍ന്നത്. പുറത്തുകൂടിയുള്ള വഴിയിലൂടെ വീടിന് മുകളില്‍ എത്തുകയും ഓടിളക്കി വീടിനുള്ളില്‍ കടക്കുകയുമായിരുന്നു. വീട്ടില്‍ ഉറങ്ങിക്കിടന്ന കുഞ്ഞിന്റെ കഴുത്തില്‍ കിടന്ന മാലയും മോഷണം പോയി.
അലമാരയില്‍ സൂക്ഷിച്ചിരുന്ന സ്വര്‍ണവും രൂപയുമാണു മോഷ്ടിച്ചത്. വീട്ടുകാര്‍ നല്‍കിയ പരാതിയില്‍ കുളത്തൂപ്പുഴ പൊലിസ് അന്വേഷണം ആരംഭിച്ചു. കൊല്ലത്ത് നിന്നും വിരലടയാള വിദഗ്ധരും ഡോഗ് സ്‌ക്വാഡും എത്തി തെളിവുകള്‍ ശേഖരിച്ചു. ആഴ്ചകള്‍ക്ക് മുന്‍പാണ് കുളത്തുപ്പുഴ പള്ളംവെട്ടി ക്ഷേത്രത്തിലും ഏഴംകുളം ശ്രീധര്‍മ ശാസ്താക്ഷേത്രത്തിലും മോഷണം നടന്നത്. ഇതിലെ പ്രതികളെ ഇനിയും കണ്ടെത്തിയിട്ടില്ല.