കൊച്ചി: പ്രൈവറ്റ് രജിസ്‌ട്രേഷനും റഗുലര്‍ വിദ്യാര്‍ഥികള്‍ക്കും ഒരുമിച്ച് പരീക്ഷയെന്ന ദീര്‍ഘനാളത്തെ ആവശ്യം എം.ജി സര്‍വകലാശാല നടപ്പാക്കുന്നു. ഇന്ന് തുടങ്ങുന്ന ആറാം സെമസ്റ്റര്‍ ബിരുദ പരീക്ഷയാണ് റഗുലര്‍ കോളജ് വിദ്യാര്‍ഥികള്‍ക്കും പ്രൈവറ്റായി രജിസ്റ്റര്‍ ചെയ്തവര്‍ക്കും ഒന്നിച്ച് നടത്തുന്നത്. ഇതുമുതല്‍ ഇനിയുള്ള എല്ലാ പരീക്ഷയും ഇത്തരത്തിലാകും നടക്കുക.
ഒരാഴ്ച മുന്‍പാണ് 2017 അഡ്മിഷന്‍ വിദ്യാര്‍ഥികളുടെ ഇനിയുള്ള പരീക്ഷകള്‍ റഗുലറിനൊപ്പം നടത്തുമെന്ന തീരുമാനം ഉണ്ടാകുന്നത്. 2019 അഡ്മിഷന്‍ മുതലുള്ള ബിരുദ വിദ്യാര്‍ഥികള്‍ക്കും പി.ജിക്കാര്‍ക്കും റഗുലര്‍ വിദ്യാര്‍ഥികള്‍ക്കും ഒരേ പരീക്ഷകള്‍തന്നെ നടത്തുമെന്ന് സര്‍വകലാശാല നേരത്തേതന്നെ വിജ്ഞാപനം ഇറക്കിയിരുന്നു. ഇതോടെ യു.ജി-പി.ജി തലങ്ങളില്‍ റഗുലര്‍ വിദ്യാര്‍ഥികള്‍ക്കൊപ്പം പ്രൈവറ്റ് രജിസ്‌ട്രേഷനുകാര്‍ക്കായി അതേ പരീക്ഷ നടത്തുന്ന ഏക സര്‍വകലാശാലയായി എം.ജി മാറും. കാലിക്കറ്റ് സര്‍വകലാശാലയില്‍ യു.ജി തലത്തില്‍ മാത്രമാണ് ഇത്തരത്തില്‍ പരീക്ഷയുള്ളത്. കേരള സര്‍വകലാശാലയില്‍ ഇതുവരെ പരീക്ഷകള്‍ ഏകീകരിച്ചിട്ടില്ല. എന്നാല്‍, കണ്ണൂര്‍ സര്‍വകലാശാലയില്‍ അടുത്ത അധ്യയനം വര്‍ഷം മുതല്‍ പ്രൈവറ്റ് രജിസ്‌ട്രേഷന് തുടക്കമിടാന്‍ തീരുമാനം എടുത്തിട്ടേയുള്ളൂ.
യു.ജി.സി നിര്‍ദേശപ്രകാരം ഉന്നത വിദ്യാഭ്യാസ മേഖലയില്‍ 2009 മുതല്‍ പരിഷ്‌കരണം വന്നതോടെയാണ് റഗുലറിലും പ്രൈവറ്റിലും സിലബസും പരീക്ഷാ രീതിയും മാറ്റിയത്.
ചോയ്‌സ് ബേസ്ഡ് ക്രെഡിറ്റ് സെമസ്റ്റര്‍ സിസ്റ്റം (സി.ബി.സി.എസ്.എസ്) എന്ന പുതിയ പാഠ്യരീതി റഗുലര്‍ വിദ്യാര്‍ഥികള്‍ക്കു മാത്രമായി പരിമിതപ്പെടുത്തിയിരുന്നു. പരിഷ്‌കരിച്ച പാഠ്യരീതി പ്രൈവറ്റില്‍ പ്രാവര്‍ത്തികമാക്കാന്‍ കഴിയില്ലെന്ന നിലപാടായിരുന്നു എല്ലാ സര്‍വകലാശാലകളും ആദ്യം സ്വീകരിച്ചത്.
എന്നാല്‍ പാരലല്‍ കോളജ് അസോസിയേഷന്‍ ഇതിനെതിരേ നടത്തിയ സമരങ്ങളുടെയും സമ്മര്‍ദങ്ങളുടെയും ഫലമായി 2010 മുതല്‍തന്നെ സി.ബി.സി.എസ്.എസ്. പ്രൈവറ്റിലും ബാധകമാക്കി.
2012 മുതല്‍ എം.ജിയില്‍ ക്രെഡിറ്റ് ആന്‍ഡ് സെമസ്റ്റര്‍ രീതി നടപ്പാക്കിയെങ്കിലും പരീക്ഷകള്‍ റഗുലറിനൊപ്പം നടത്തിയിരുന്നില്ല. ഇതിനാണ് ഇന്നത്തോടുകൂടി മാറ്റമുണ്ടാകുന്നത്.