നാദാപുരം: തൂണേരി കുഞ്ഞിപ്പുരമുക്കില്‍ ബസ് മറിഞ്ഞു ഇരുപതോളം ആളു കള്‍ക്ക് പരുക്കേറ്റു. സാരമായി പരുക്കേറ്റ രണ്ടു പേരെ തലശ്ശേരി സ്വകാര്യ ആശുപത്രിയിലും മറ്റുള്ളവരെ ചൊക്ലി മെഡിക്കല്‍ സെന്ററില്‍ പ്രവേശിപ്പിച്ചു. കാട്ടില്‍ അമ്മദ്, രവി കുന്നുമ്മല്‍ (നാദാപുരം), ജോസ് (കല്ലുനിര), സനില 46 (അഴിയൂര്‍ ), കൃഷ്ണ കുമാരി 78 ( ഇരിങ്ങണ്ണൂര്‍) സമീറ 38 (ഇരിങ്ങണ്ണൂര്‍) റീന 43 (പാനൂര്‍) ശിവന്യ ഏഴ് (ഇരിങ്ങണ്ണൂര്‍), കുഞ്ഞിരാമന്‍ 55 (നിരവില്‍ പുഴ), അമ്മദ്മുടവന്തേരി, ഷഫിന്‍ 15 (ഇരിങ്ങണ്ണൂര്‍), അയിഷ (കടവത്തൂര്‍ ), ഹരിദാസ് 59 (കോറോത്ത് റോഡ്), സൈമണ്‍ 57 (തൃശ്ശൂര്‍) വിനീഷ് 32 (ഭൂമിവാതുക്കല്‍) എന്നിവര്‍ക്കാണ് പരുക്കേറ്റത്.
ഇന്നലെ വൈകിട്ട് അഞ്ചോടെയാണ് നിറയെ യാത്രക്കാരുമായി തൊട്ടില്‍പ്പാലത്തു നിന്നും തലശ്ശേരിയിലേക്ക് പോവുകയായിരുന്ന സ്വാതി ബസ് അപകടത്തില്‍ പെട്ടത്. അമിത വേഗതയിലായിരുന്ന ബസിനു മുന്‍പിലേക്ക് പോക്കറ്റ് റോഡില്‍ നിന്നും സ്‌കൂട്ടര്‍ കയറിയതോടെ നിയന്ത്രണം വിട്ടു റോഡിനു സമീപത്തെ മണ്‍മതിലില്‍ ഇടിച്ചു മറിയുകയായിരുന്നു. സ്‌കൂട്ടര്‍ യാത്രികന്‍ നിസാര പരുക്കുകളോടെ രക്ഷപ്പെട്ടുവെങ്കിലും ബസിനടിയില്‍ കുടുങ്ങിയ സ്‌കൂട്ടര്‍ പൂര്‍ണമായും തകര്‍ന്നു.