ജിദ്ദ: 19 ഭീഷണി നേരിടുന്ന മധ്യപൗരസ്ത്യദേശത്ത് ഏറ്റവും കൂടുതൽ ഭക്ഷ്യശേഖരമുള്ളത് സഊദിയിലാണെന്ന് വാണിജ്യ മന്ത്രാലയം പറഞ്ഞു. കൊറോണ വ്യാപനത്തിന്റെ പശ്ചാത്തലത്തിൽ മറ്റു ചില രാജ്യങ്ങളിലേതു പോലെ സഊദിയിലും ഭക്ഷ്യക്ഷാമം നേരിട്ടേക്കുമോയെന്ന ഭീതി ചിലരിൽ ഉടലെടുത്തിട്ടുണ്ട്. എന്നാൽ ഇതിന് യാതൊരു അടിസ്ഥാനവുമില്ലെന്നും മേഖലയിൽ ഏറ്റവുമധികം ഭക്ഷ്യശേഖരമുള്ളത് സഊദിയിലാണെന്നും വാണിജ്യ മന്ത്രാലയം പറഞ്ഞു. 

നിത്യോപയോഗ വസ്തുക്കളും ഭക്ഷ്യവസ്തുക്കളും ഇഷ്ടാനുസരണം ലഭ്യമാണെന്ന് ഉറപ്പു വരുത്തുന്നതിനും പൂഴ്ത്തിവെപ്പും അന്യായമായ വിലക്കയറ്റവും അടക്കമുള്ള നിയമ ലംഘനങ്ങൾ തടയുന്നതിനും കുറ്റക്കാർക്കെതിരെ ശിക്ഷാ നടപടികൾ സ്വീകരിക്കുന്നതിനും ചില്ലറ, മൊത്ത വ്യാപാര കേന്ദ്രങ്ങളിൽ വാണിജ്യ മന്ത്രാലയം പരിശോധനകൾ നടത്തുന്നുണ്ട്. രാജ്യത്ത് ഗോതമ്പ് സംഭരിച്ച് മൈദയാക്കി സബ്‌സിഡി നിരക്കിൽ വിതരണം ചെയ്യുന്ന സർക്കാർ ഏജൻസിയായ സഊദി ഗ്രെയ്ൻസ് ഓർഗനൈസേഷനു കീഴിലെ മൈദ ഗോഡൗണുകളിലും മന്ത്രാലയ സംഘങ്ങൾ പരിശോധനകൾ നടത്തിയിട്ടുണ്ട്. 33 ലക്ഷത്തിലേറെ ടൺ ഗോതമ്പ് സംഭരിക്കുന്നതിന് സഊദി ഗ്രെയ്ൻസ് ഓർഗനൈസേഷനു ശേഷിയുണ്ട്. ഓർഗനൈസേഷനു കീഴിലെ ഗോഡൗണുകളിൽ വിതരണത്തിന് തയാറായ നാലര ലക്ഷം ചാക്ക് മൈദ സ്റ്റോക്കുണ്ട്. ഗാർഹിക ആവശ്യത്തിനുള്ള 2,80,000 പാക്കറ്റ് മൈദയും വാണിജ്യ ആവശ്യത്തിനുള്ള 2,70,000 ചാക്ക് മൈദയും ഓർഗനൈസേഷനു കീഴിലെ മില്ലുകളിൽ ദിവസേന ഉൽപാദിപ്പിക്കുന്നു. മില്ലുകളുടെ പ്രതിദിന ഉൽപാദന ശേഷി 15,000 ടൺ ആണെന്നും വാണിജ്യ മന്ത്രാലയം പറഞ്ഞു. 

പ്രാദേശിക വിപണിയുടെ ആവശ്യത്തിന് പര്യാപ്തമായത്ര മാസ്‌കുകൾ സഊദിയിൽ തന്നെ നിർമിക്കുന്നുണ്ടെന്നും വാണിജ്യ മന്ത്രാലയം വ്യക്തമാക്കി. മാസ്‌ക് ക്ഷാമത്തെ കുറിച്ച ഭീതിയുടെയും കൊറോണ വ്യാപനത്തിന്റെ പശ്ചാത്തലത്തിൽ ആവശ്യം വലിയ തോതിൽ വർധിച്ചതിന്റെയും ഫലമായി സഊദിയിൽ മാസ്‌കുകളുടെ വില വലിയ തോതിൽ വർധിച്ചിട്ടുണ്ട്. മാസ്‌കുകളുടെ വില പലമടങ്ങ് വർധിച്ചിട്ടുണ്ട്. ഈ പശ്ചാത്തലത്തിലാണ് ഭീതി ആവശ്യമില്ലെന്നും പ്രാദേശിക വിപണിക്ക് ആവശ്യമായത്ര മാസ്‌കുകൾ സഊദിയിൽ തന്നെ നിർമിക്കുന്നുണ്ടെന്നും വാണിജ്യ മന്ത്രാലയം വ്യക്തമാക്കിയത്. 

സഊദിയിൽ മാസ്‌കുകൾ നിർമിക്കുന്ന അഞ്ചു ഫാക്ടറികളുണ്ട്. മാസത്തിൽ വ്യത്യസ്ത ഇനങ്ങളിൽ പെട്ട ദശലക്ഷക്കണക്കിന് മാസ്‌കുകൾ ഇവിടങ്ങളിൽ നിർമിക്കുന്നു. മാസ്‌ക് നിർമാണത്തിന് ആവശ്യമായ അസംസ്‌കൃത വസ്തുക്കൾ 100 ശതമാനവും സഊദി നിർമിതമാണ്. മാസ്‌കുകളുടെ മതിയായ ശേഖരമുണ്ടെന്ന് ഉറപ്പു വരുത്തുന്നതിന് മാസ്‌ക് നിർമാണ ഫാക്ടറികളിൽ വാണിജ്യ മന്ത്രാലയ സംഘങ്ങൾ പരിശോധനകൾ നടത്തിയിട്ടുണ്ട്.