പാപ്പിനിശ്ശേരി: തുരുത്തി കോളനിയിലെ ജനവാസ കേന്ദ്രങ്ങള്‍ നശിപ്പിച്ച് ദേശീയപാത ബൈപാസ് നിര്‍മിക്കാനുള്ള നീക്കത്തിനെതിരേ കോളനിവാസികള്‍ നടത്തുന്ന കുടില്‍ കെട്ടി സമരം നാലാം ദിവസത്തിലേക്ക്. ബൈപാസ് നിര്‍മിക്കാന്‍ സര്‍വേ എടുത്ത സ്ഥലത്താണ് സമരം. കോളനിയിലെ കുട്ടികളും സ്ത്രീകളും അടക്കമുള്ളവരാണ് സമരപന്തലിനെ സജീവമാക്കുന്നത്. സമരത്തിന്റെ മൂന്നാം ദിവസമായ ഇന്നലെ നിരവധിപേര്‍ സമരത്തിന് പിന്‍തുണയുമായി എത്തി. സമരത്തിന്റെ പുതിയ ഘട്ടത്തെക്കുറിച്ച് ആലോചിക്കുന്നതിന് കര്‍മസമിതി യോഗം ചേരും. സര്‍വേ നടത്തിയ ഭാഗത്ത് 18 വീടുകള്‍ പൂര്‍ണമായും പത്തോളം വീടുകള്‍ ഭാഗികമായും പട്ടികജാതി വിഭാഗക്കാരുടെ ആരാധനാ കേന്ദ്രവും ഉള്‍പ്പെടും.