ഒറ്റപ്പാലം: റോഡ് നിര്‍മാണത്തില്‍ വേണ്ടത്ര ടാര്‍ ഉപയോഗിച്ചില്ലെന്ന് പരാതിയേ തുടര്‍ന്ന് പാച്ച് വര്‍ക്ക് പ്രവൃത്തികളും, റീ ടാറിങും വീണ്ടും ചെയ്തു. ജില്ലാ പഞ്ചായത്ത് ഫണ്ട് ഉപയോഗിച്ച് റീടാറിങ് ചെയ്യുന്ന അമ്പലപ്പാറ ഗ്രാമപഞ്ചായിലെ അറവക്കാട് വാര്‍ഡില്‍ പരപ്പില്‍ തോട് റോഡിലാണ് നിര്‍മാണ സമയത്ത് തന്നെ ക്രമക്കേട് ഉയര്‍ന്നത്. പഞ്ചായത്ത് മെമ്പര്‍ ടി.പി കൃഷ്ണകുമാറിന്റെ നേതൃത്വത്തിലെത്തിയ നാട്ടുകാര്‍ താല്‍ക്കാലികമായി പ്രവൃത്തികള്‍ നിര്‍ത്തിവയ്ക്കാന്‍ നിര്‍ദേശിക്കുകയായിരുന്നു.
ശേഷം പദ്ധതി നിര്‍വഹണ ഉദ്യോഗസ്ഥരെ വിളിച്ചുവരുത്തുകയും, എന്‍ജിനീയറിങ് വിഭാഗം പരിശോധിക്കുകയും, ടാര്‍ ഉപയോഗിച്ചില്ലെന്ന് കണ്ടെത്തുകയും ചെയ്തു. തുടര്‍ന്ന് പരാതി പ്രദേശങ്ങളില്‍ ചെയ്ത പാച്ച് വര്‍ക്ക് പ്രവൃത്തികളും റീ ടാറിങും വീണ്ടും ചെയ്യണമെന്ന് കരാറുകാരന് നിര്‍ദേശം നല്‍കി. ഇതേതുടര്‍ന്ന് റോഡില്‍ പാച്ച് വര്‍ക്ക് ചെയ്ത മുഴുവന്‍ ഭാഗങ്ങളും നീക്കം ചെയ്തു വീണ്ടും കാര്യക്ഷമമായ രീതിയില്‍ പ്രവൃത്തികള്‍ ചെയ്യുകയായിരുന്നു. 20 ലക്ഷം രൂപ വിനിയോഗിച്ച് നടക്കുന്ന പ്രവൃത്തികളിലാണ് ആരോപണമുയര്‍ന്നത്. ടാര്‍ ഉപയോഗിക്കാതെ പാറപ്പൊടികൊണ്ട് മാത്രം റോഡിലെ കുഴികള്‍ അടക്കുന്നതായാണ് പരാതി ഉയര്‍ന്നത്.