തുറവൂര്‍: നിയന്ത്രണംവിട്ട ടാങ്കര്‍ ലോറിയിടിച്ച് ബൈക്ക് യാത്രികനും സൈക്കിള്‍ യാത്രികനും ഉള്‍പ്പെടെ രണ്ടു പേര്‍ മരിച്ചു. ഒരാള്‍ക്ക് ഗുരുതരമായി പരുക്കേറ്റു.
ദേശീയപാതയില്‍ പട്ടണക്കാട് പൊലിസ് സ്‌റ്റേഷന് മുന്‍വശത്ത് ഇന്നലെ രാവിലെ പത്തിനായിരുന്നു അപകടം. നിയന്ത്രണംവിട്ട ടാങ്കര്‍ ലോറി മൂന്ന് വാഹനയാത്രികരെ ഇടിച്ചു തെറിപ്പിക്കുകയായിരുന്നു. ഈ സമയത്ത് പൊന്നാം വെളിയില്‍ വാഹന പരിശോധന നടത്തുകയായിരുന്ന പട്ടണക്കാട് എസ്.ഐയും സംഘവും തലനാരിഴയ്ക്കാണ് രക്ഷപ്പെട്ടത്. സൈക്കിള്‍ യാത്രികനായ പട്ടണക്കാട് ഗ്രാമപഞ്ചായത്ത് ആറാം വാര്‍ഡില്‍ പള്ളിപ്പറമ്പില്‍ അപ്പച്ചനാ(71)ണ് തല്‍ക്ഷണം മരിച്ചത്. ഗുരുതരമായി പരുക്കേറ്റ ബൈക്ക് യാത്രികനായ ചെല്ലാനം കുരിശിങ്കല്‍ വീട്ടില്‍ ജോയി (60) യെ ചേര്‍ത്തല താലൂക്കാശുപത്രിയില്‍ എത്തിച്ചെങ്കിലും രക്ഷിക്കാനായില്ല.
മറ്റൊരു ബൈക്ക് യാത്രികയായ തുറവൂര്‍ ഗ്രാമപഞ്ചായത്ത് നാലാം വാര്‍ഡില്‍ ഒലിക്കര നികര്‍ത്തില്‍ ലിജോ തങ്കച്ചന്റെ ഭാര്യ ജാന്‍സി(35)യുടെ കാലൊടിഞ്ഞതിനാല്‍ എറണാകുളത്തെ സ്വകാര്യ ആശുപത്രിയില്‍ പ്രവേശിപ്പിച്ചു. ടാങ്കര്‍ ലോറിയുടെ ഡ്രൈവറെ കസ്റ്റഡിയിലെടുത്തു.